Bobanın, Oolun hem Ayoz Duhun adına.
Sevgili kardaşlar hem kızkardaşlar!
Apostol Andrey var Hristozun oniki üürenicilerin arasından hem da denilyer ona İlkçaarılmış. Biz göryarkana Hristozun üürenicilerini, angısınnar bulunyardılar Onun yanında, en yakındı Ona oniki üürenici. Vardı başka da üürenicilär Hristozda, vardılar karılar, angısınnar izmet edärdilär, ölä söleer Ayoz Yazı, kendi varlıınnan. Bu oniki üürenicinin bütün topraa daaldı haberi, dünyenin bitkisinädak onnarın lafları daaldılar. Neçin deyni onnar gezdilär da nasaat ettilär Hristozun Ayoz Enangeliyasını, Hristozun yaşamasını, Hristozun izmetini erdä, angı neetlän Hristoz geldi izmet etmää erdä.
Hristozun oniki üürenicinin arasında vardı kardaşlar, iki kardaş vardı Andrey hem Petri, hem da vardı taa iki kardaş — İoann Allahsözü hem da İyakov, onnar vardılar Zevedeyin oolları. Andrey hem İoann vardılar İoann Vartizedicin üürenicileri. Onnar beklärdilär gelsin Kurtarıcı – Messiya. Da açan göryerlar İoann Vartizediciyi, sanyerlar, ani o var Messiya, ama İoann Vartizedici ölä söleer, ani “bän diil Kurtarıcı, ama gelyer Kim sa benim ardıma, ani var bendän ileri. O bän sizi vartizederim suylan, O sizi vartizedecek ateşlän hem da Ayoz Duhlan.”
Ozaman, açan sıra gelyer artık Hristoza vartiz olmaa, İoann Vartizedeci gösteryer Hristoza: “Te nerada Allahın Kuzusu, Angısı alyer Kendi üstünä dünyanın günahlarını”. Da bu laflardan sora Andrey hem İoann giderlar Hristozun ardına.
Böönkü Evangeliyada biz işittik, ani onnar giderlar Hristozun ardına, Hristos onnarı gördüynän deyer: “Ne isteersiniz?”
Andrey hem İoann sölerlär: ”Saabi, nerada yaşȇȇrsın?”
Hristos dedi: “Gelin da göreciniz”, da giderlar Onun ardına.
Açan üürenyerlar, ani Hristos var Kurtarıcı, var Messiya, Angısı adanmış eveldän taa, ozaman Andrey gelyer kendi kardaşına Petriya da söleer, ani buldu Messiyayı, buldu Kimi adadı proroklar. Petri, Andreyin kardaşı, öbürü da İyakov vardı İoannın kardaşı, onnar da giderlär Hristozun ardına. Onnar en ilk Vifsaidadan giderlär da çaaryerlar Filippı. Filipp sora gider da çaaryer Nafanailı.
Andrey, Petri, İoann hem İyakov olyerlar Hristozun üürenicileri, ama onnar durmamışlar çok vakıt Onunnan bilä, birkaç aya ayırılyerlar. Da sora biz göryeriz, ani Hristos geçer da toplȇȇr Kendi üürenicilerini. Geçärkana denizin kenarından, göryer iki kardaşı, onnar vardı Andrey hem da Petri. Hristozun üürenicilerin taa zeedisi vardılar balıkçı, bunnan kazanyardılar kendinä bir parça ekmek. Göryer Hristos onnarı da deyer: “Gelin Benim ardıma, da Bän sizi yapacam insan avcısı”. Siz şini tutȇrsınız balık, varsınız balık avcısı, açan geleciniz Benim ardıma, yapacam sizi insan avcısı, siz getireciniz Gökteki Padişahla insannarı. Bu olacek sizin zanaatınız, lääzım olacek ötää dooru izmetedäsiniz. Da onnar bir lafsız brakȇrlar hepsini da giderlär Hristozun ardına.
Andrey da vardı ilkçaarılmış, angısı izmet etti, angısına verildi çok erlär. Apostol Andreyä düşer pay nasaat etmä Kara denizin kenarında. Ölä söler Predaniye bizä, ani apostol Andrey gelyer bizim taraflara nasaatetmää, bu erä eker hristiannıı. Bu erdä insannarı üüredyer, çeviryer, vartiz eder, onnara eker tomları, angısınnarı verdi onnara Hristos.
Nasaatedärkana urumlara, padişaa inanmȇr onun nasaatına, söleer alsınnar onu da baalasınnar stavroza, taa oya kabletsin ölüm deyni. “X” gibi stavroza gererlär onu, baalȇȇrlar onun ellerini ayaklarını, ama kakmȇrlar, ani ölüm onda olsun taa zeetli. Ama insan, angısı orada bulunyarmış göryerlar, ani diil dooru düşer ona bu zeetlär da kalkȇrlar padişaya, isteyerlar, ani salversin. Ama kendi apostol Andrey yalvaryer, ani dayansın bitkiyadak, zeet çeksin, kabletsin ölüm stavrozda. Üç gün taa geriliykana stavrozda o taa nasaateder, üüredyer insannarı. Sora Allah alyer onun canını. Te böölä geçer onun izmeti, nasaatetmesi.
62-cı yilda Hristozun duumasından beeri olyer ölüm günü, nezaman apostol Andrey zeet çekti.
Prot. Feodor Karakalçev
