Bobanın, Oolun hem Ayoz Duhun adına! Sevgili kardaşlar hem kızkardaşlar, Panayıyanın duuması getirdi sevinmelik bütün dünneyä, ölä bizim Ayoz Klisä böönkü günda çalȇr.
Açan uşak gelyer dünneyä, duȇȇr, o var sade sevinmelik, neçin deyni ona herkerä sevinyer evdekilär da, bobası da, anası da, sevinyer soylar, sevinyer komuşular, hepsicii. O var sevinmelik yortusu!
Açan sıra gelyer Panayıya duumaa, o vardı taa büük sevinmelik. Bir taraftan, bobası-anası artık yaşlıydı insannar, angısınnarın olmardı uşakları hem da bir kahır onnardaydı: onnar, nicä herbir aylä isterlär olsun uşakları, onnarda olmardı uşaklar. İkincı da, kahır – onnara deyni bu vardı nicä büük utanmak, raz onnarın uşakları olmȇr, ozaman onnar büük günahker hem yok nicä pay onnarda olsun Kurtarıcın duumasında. Neçin deyni hepsicii bekläärdi, ani onnarın senselesindän duacek Kurtarıcı. Sayılyardı, ani onnar günahker.
Bobasına-anasına, artık yaşlı, Allah veryer Uşak onnarın dayanmasına görä. Ne örnek var bizä deyni böönkü yortu?
İki örnek: örnek ayleya deyni hem da örnek, ani uşakları üüretmää, terbi etmää.
İlk, baktıynan herbir ayleyä, dayanmaklan çok işlär üstelenyer. Baktıynan böön bizä, biz aarȇȇrız kaçarak, açan bizdä nesa olmȇr, yada yaşamak olmȇȇr aylemizdä, yada açan Allah vermer bizä uşak, ozaman çekedyeriz aaramaa, çok türlü erlerdä gezmää da aaramaa, ne var nicä yapmaa da doorutma ayleyi, ne var nicä yapmaa, da olsun uşaklarımız. Bir keretta sayıklamȇrız, koymȇrız uura kendimizi, ani biz bekim nesa yapmadık, bekim dooru yaşamadık, bekim dooru evlenmedik. Bekim sıra geldi, nicä bizdä olyer, ani çekedmedän bizim uşaklarımız olmasın, ama biraz yaşayalım kendimizä deyni da sora, açan gideciz da kazanacız bekim taa on – onbeş yıl kazanacız, düzeciz kendimizä ev da erleşeciz erimizä da ozaman isteyeciz bekim da uşacık, şini onnar bizä diil lääzım. Te ölä baktıynan, biz kendimizdä var nicä bulalım çok sebep, neçin bizdä çok işlär olmȇr, neçin bizdä gitmeer te ölä nicä lääzım olsun.
Biz isteyeriz bizim aylemiz olsun, biz diil lääzım arayalım kendimizä nesa: kimi sa üstelemää, bakmaa da geeri çevirmää da yapmaa nesa fenalık. Lääzım herbir işä üürenmää dayanmaa. Lääzım herbir işä deyni üürenmää herbir uurlarda, herbir zorlarda, herbir kahırlarda üürenmää lääzım dua etmää. Lääzım üürenmää oruç tutmaa, lääzım üürenmää gelmää klisä.
İkinci örnek var dooru örnek, ani üüretmä, terbi etmää (воспитывать) uşaklarımızı. Uşak lääzım üüredilsin duaa, üüredilsin Allahın lafına, üüredilsin klisä, üüredilsin komka taa uşak emen olacıyna (с момента зачатия), açan sa uşak duȇȇr, artık uşak lääzım işitsin Allahın lafını.
Bizä var herkerä herbir yortu: Hristozun Duuması, Hristozun yortuları, Panayıyanın da yortuları, ayozların yortuları — onnar var bizä örnek, nicä lääzım yaşayalım, nicä lääzım bizdä herbir iş yaşamamızda olsun dooru. Eer nesa olmarsa bizim yaşamakta, lääzım o maanayı kendimizdä aarayalım, neçin deyni çok işlär bän yapmadım, çok erlerdä bän dayanamȇrım. Ne veryer Allah, o stavrozu lääzım taşımaa. Veryer bekim fena koca, ozaman o stavrozu taşı, bekim o içer, onu genä lääzım taşımaa, bekim karı fena, genä ona da lääzım dayanma. Herbir stavroza, angısı Allahtan verilyer, lääzım dayanmaa. Allah veryer bunnar için Kendi baaşılarını, ani sän dayandın, ani sän aaramadın bozmaa ayleyi, aaramadın diiştirmää adamını yada karını da bunnar için sana verilyer baaşış. Uşaklarını da savaştın üüretmää dooru, savaştın koymaa dooru yola, savaştın, ani gitsinnär Allahın yolundan. Bunnar için da hem hepsin için sana sıra gelyer kabletmää kendi baaşışlarını. Amin.
Prot. Feodor Karakalçev