İnanyerım, yardım et benim inansızlııma
Проповедь в неделю IV Великого поста (Св. Иоанн Лествичник)
Bobanın, Oolun hem Ayoz Duhun adına!
Sevgili kardaşlar hem kızkardaşlar!
Evangeliya bizä annadyer: bir boba yaklaşyer Hristoza da yalvaryer Ona alıştırsın onun oolunu, angısını şeytan zeetler küçüklüündän beeri. Çok seret atarmış suya, çok seret atarmış onu ateşä. Çok seret o düşer erä, köpüklenyer dişleri, kendisi kaskatılanyer hem da dişlerini çekedyer gıcırdatmaa. Da yalvaryer Hristoza: eer bir varınca sa neylan sa yardım etmää, yardım etsin. Da Hristos en ilk söleer: “Ey, inansız senselä. Nekadar sizä dayanım?”
Neçin deyni çok işlär olyer insanın inansızlı için. O çocuun bobası söleer: “Bän getirdim onu Senin üürenicilerinä, da onnar kolayamadı şeytanı ondan”.
Neçin bu olmadı?
Neçin deyni göryeriz ötää dooru , ani bobasının vardı inansızlıı. Yoktu onda bütün inan. Onun için Hristos deer: “Eer bir sän inana bilyarsan, herbir iş var nicä olsun”. Da o söleer okadar lafları, tanıyer kendi kuvetsizliini, tanıyer kendi inansızlıını da söleer: “İnanyerım, yardım et benim inansızlııma”. Okadar isteer Hristozdan yardım etsin onun inansızlıına. Açan Hristos koolȇȇr o uşaktan şeytanı hem sorȇr uşaan bobasına: “Nezamandan beeri bu olyer uşaklan böölä?”. O deyer, ani küçüklüündän beeri.
Neçin sorȇr Hristos?
Neçin deyni küçüklüündä taa göreräk, ani bobasının var inansızlıı, Allaa isteer nekadar sa dürtmää onun üreeni. Neçin deyni bobası vardı kaskatı, bobası vardı inansız. Da Allaa veryer uşaandan aşırı onun ürää nekadar sa dürtülsün. Da o buunarı göreräk olsun nekadar sa inanlı. Ama ozamandan nekadar vakıt geçmiş, bukadar vakıt zeetler şeytan onun uşaanı da o kendi kaskatı üräännen birtürlü dürtülmeer, annamȇȇr, tanımȇȇr, ani o lääzım annasın, ani var Allaa, ani Allaa var nicä onu alıştırsın.
Da şini, açan işidyer, göryer, ani Hristos gezer erdä hepsini alıştıryer hepsinä yardım eder hem yollȇȇr Kendi üürinicilerini nasaat etsinnär. O yaklaşyer Hristozun üürenicilerinä, ama onnar da bişey yapamȇrlar.
Neçin yapamȇrlar? Neçin deyni diil sade üürenicilär, Hristos için da sölenyer Ayoz Yazıda – hererdä yapamadı çok nışan, neçin deyni insannarın vardı inansızlıı.
Pek paalı laflar, angısınnarı söleer Hristos te o bobaya, ani kim inanyer – ona deyni var nicä olsun hepsicii. Amin.
Prot. Feodor Karakalçev
