Bobanın, Oolun hemAyoz Duhun adına!
Sevgili Kardaşlar hem kızkardaşlar!
Böökü gündä, bu yortuda hepsiciinä vardı sevinmelik. Hristoz, bak, nelär yaptı: dün diriltti Hristoz Lazari. Onu şindiyadan kimsey yapmadı. Dört gün artık Lazar bulunardı mezarda. Hristoz onu diriltti. Hepsicii geler görmää, nelär oldu, bukadar büük nışan. Şindiyadan kimsey bunnarı yapmadı. O var halizdän dä prorok. Hepsicii geler da karşlȇȇr Onu, sevineräk. Kimsa çıkarıp, rubalarını döşeer erä, öbürlär fidannardan keserlär dal da hepsicii karşlȇȇr, hepsicii söleer: “Осанна в вышних, благословен Грядый во имя Господне.” Aaz vakıt geçer, pek aazıcık vakıt da hepsicii baarȇȇr: “Al, al da geer stavroza Onu.” Neçin? Birisinä bişey yapılmadı, fenalık, sade iilik.
Nicä söleer boba Nikolay Serbskiy, açıklȇȇr böönkü yortunun maanasını. Hristozun girmesi İerusalimä var nicä O girer herbir insanın üreenä.
İerusalimdä kiyatçılar koymişlar neetinä öldürmää diil sade Hristozu, ama öldürmää Lazari da, neçin deyni Lazarin sebepinä çooyu inanȇrlar Hristoza da giderlär Onun aardına. Açan Hristoz girer insanın içinä, orada olȇr kavga, neçin deyni bizim içimiz dolu mındarlıklan, günahlarlan. O günahlar oradan istämeerlär çıkmaa. Onun için da onnar karşı koyerlar, onun için da tepinerlär, sölenerlär, ani istämeerlär brakılmaa bizdän, neçin deyni günahlar bulyerlar pek islää er kendinä bizim canımızda, bizim üreemizdä. Onnar oradan istämeerlär çıkmaa. Onun için onnar üfkelenerlär, sölerlär nesaydı. Te ölä burada da olȇr, ani insannar hepsicii karşılamȇȇrlar Hristozu bütün üreklän. Te ölä günahlarmız da bizim istämeerlär çıkmaa. Ama Hristoz girer orayı, neçin deyni canımızda bizim var taa er, nerası kableder Hrisozu, nerası istämeer, ani kalsın orası boş, isteer, ani Hristoz girsin orayı, neçin deyni can — hristianin, te onun için o can aarȇȇr Allahı. Amin.
Prot. Feodor Karakalçev
