Boban, Oolun hem Ayoz Duhun adına.
Sevgili kardaşlar hem kızkardaşlar!
Baktıynan erdekiycäsına, Allaha inanmaa kurtarmȇr. Kurtarmȇr, neçin deyni insan açan inanyer Allaha, lääzım getirsin kurban, bütün yaşamasında lääzım hep getirsin kurban.
Kurban getirmää – o diil sade, nicä biz düşünyeriz, ani aldık da verdik bir kuzu yada nesa. Kurban — o bütün yaşamamız. Açan bän bölerim kendi raatlıımı – o kurban. Açan bän bölerim kendi paramdan – o kurban. Açan bän bölerim kendi vakıdımdan – o kurban. Açan bän bölerim kendi gençliimi – bu da var kurban. Baktıynan yaşamanın gözälliklerini, nicä biz düşünyeriz erdekiycasına, ani gençkana isteeriz raat yaşamak, isteriz onu görmää, bunu görmää, onu datmaa, bölä giinmää , bölä imää. Allaha açan inanyersın onnardan hepsindän lääzım birazçık böläsin.
Ama en büük kurban, nicä Hristos söleer, açan biz severiz Allahı, ozaman biz anȇrız Onun sımarlamalarını.
Hem büük kurban göryeriz böönkü ayozda da, ayoz Dmitriy Solunskiyda. Var ölä urum kasabası Fessaloniki, orada böönnen-böön var onun adına klise, angısını imperator Konstantin düzer. Ayoz Dmitriyi vardı pek genç, bobası-anası vardı saklı hristian (тайные). O diildi fukaarä, o zengindi, ona açılyardı pek geniş bir yol, o yaşayacıydı raat, onu sayacıydılar. Onu padişaa da sayardı, sevärdi , ona kalyardı sade gitmää başka yoldan, ama o ayıryer Hristozun yolunu. Ona sımarlȇȇrlar, ani hepsi hristiannarı öldürmää, zeetlemää, o yapȇr ölä, ani kendisi açık inan eder Hristozu da bunnar için kableder ölüm. Genç, gözäl, vaarlı, ama o ayıryer Hristozu. Açan biz hepsimiz ayıryerız Hristozu, biz lääzım bilelim, ani biz ayıryerız diil raatlı yol , biz aaramȇȇrız kendimizä raat yaşamak.
Bizä böönnen-böön Klise gösteryer, açıklȇȇr ayozların yaşamasını. Ani Hristozdan, Panayıyadan kaarä Klise gösteryer ayozları, ani onnar bizim aramızdaydılar, onnar bizim gibi yaşamak yaşadılar, ama bizi ayıryer te o, ani onnar bütün ürektän ayırdılır Hristozu. Ona deyni getirdilär kurban kendi gençliini, kendi zenginniini, kendi metinniini, neçin deyni bu Gümüşü, bu Altını, angısına denilyer Hristos, Onu bişeylän başka yok nasıl diiştirmää. Yok nicä bulmaa ölä ödek, angısınnan var nicä ödemää da diiştirmää Hristozu. Neçin deyni Hristos var hepsindän paalı hem Ona deyni kurban veryer saalını da, veryer yaşamasını da, veryer gözällini da hem herbir işi, da geeri kabledyer Hristozu hem daymalı yaşamayı. Amin.
Prot. Feodor Karakalçev
