Проповедь в 4-ю неделю Великого поста. Св. Иоанн Лествичник
Bobanın, Oolun, hem Ayoz Duhun adına. Sevgili kardaşlar hem kızkardaşlar. Artık geerdä kaldı bizim orucun taa zeedesi, neçin deyni biz aykırladık orucun yarısını. Gelyer vakıt yapmaa kendimizä çıkışlar hem da ötä doru nicä geçirmää basamak-basamak bu orucu.
Tanıyarkana kendi günahlarımızı, var nicä brakılalım onnardan, herbir isteyarsak. Açan biz onnarı görmeriz, ozaman biz onnardan zor brakılacız, eer biz onnardan istämärsak brakılmaa, biz genä onnardan zor brakılacız. Ama açan biz koymuşuk neetimizä, açan gideriz bu Paskellä orucundan yavaş-yavaş, basamak-basamak, nicä merdvenä sıra gelyer pinmää, atlamȇȇrız birdän en yıkarkı basamaa, ama gideriz sırasıncasına. Çekedyeriz aşaakı basamaktan sora ikinciya, sora üçüncüya, sora dördüncüya. Te ölä lääzım olsun yaşamamızda: azar-azar günahları savaşmaa üstelemää. Açan biz istämeeriz brakılmaa günahlardan, ozaman biz bulunyerız em dibindä, yıvarlanyerız batak içindä, nicä mındarlık içindä yıvarlanyerız te o günahlarda.
Da böönkü gündä bizim Ayoz Klisä getiryer aklımıza bir izmetini bir ayozun, angısı var İoann Merdvenci. Ona onun için da verildi ad, neçin deyni o kurȇr ölä nasaat — çıkmaa yıkarı basamak-basamak, nicä merdvendän pinersin. Onun için da ona verilyer ölä ad Mervenci. Onun nasaadı, onun üüretmesi gösteryer, nicä biz basamak-basamak var nicä çıkalım yıkarı.
Bölä apostol Pavel söleer, nicä lääzım olsun o basamaklar: nedän biz hepsimiz kahırlanyerız, kimärkerä sölenyeriz da çok, ama açan bizä gelyer bir kahır, sayerız, ani o büük bir zorluk. Ama herbir işi Allahın o var yollanma bizä, ani biz ondan aşırı kurtulalım. Bizä deyni, iilä deyni. Neçin deyni ölä söleer apostol Pavel: kahırdan aşırı üürenyeriz dayanmaa, dayanmak veryer bizä ariflik, ariflik bizä veryer umut, umut da hiç bir vakıt ta utanmȇr, neçin deyni hepsinin başı hepsinin ikarsı var sevgilik. Te ölä biz lääzım çıkalım basamak-basamak yıkarı. Kolay yok nicä olsun…
Prot. Feodor Karakalçev
