Проповедь в третий день Великого Поста
Bobanın, Oolun hem Ayoz Duhun adına!
Sevgili kardaşlar hem kızkardaşlar!
Herbir iş, angısı bizä verilyer büük izmetlän, zorlan, zeetlän, herkerä bizä deyni olyer taa paalı, biz onu taa tutȇrız aklımızda. Te o işläär var bizä paalı, angısınnar verilyer zor. Angısınnar kolay verilyer, biz onnarı unudyerız, onnarı tutmȇrız aklımızda.
Bizim izmetimiz bu komka deyni, demeycam ani kayet büük izmet.
Böölä bizdä aklımız da gezer duada, fikirimiz nerada sa gidärkana izmet, duaedärkana da, komkaya da azırlanmamışık. Gelyeriz almaa komkamızı, duymȇrız da, ani Hristos girdi bizim içimizä. Birazçık açan lääzım olyer taa zeedä durmaa ayakça, taa zeedä metaniya yapmaa, imemää, içmemää, ozaman birazçık taa düşünyeriz, sayıklȇȇrız, taa zeedä bekleeriz komkayı. Ölä da sölenyer “İyin da annayın, nekadar İi var Saabi”(Вкусите и видите, яко благ Господь). Nekadar İi var Saabi, biz annȇȇrız, açan bizdä var zor, kahır.
Baktıynan evelki hristiannara, nekadar vardı onnarın ii atırı (благочестие), biz onnardan kayet uzakız. Annardılar onnar liturgiyanın derinniini, fikirleri onnarın gezmärdi. Diildi ölä, ani onnara deyni liturgiya geçsin ötää beeri. Biz birtürlü üürenmeyeciz, nicä kendimizi götürmää klisedä: biz bilmeriz, ani klisedä lääzım sade susmaa; lääzım harç-toplayıcı (мытарь) gibi başımızı iiltmää aşaa da demää: Allahım, hayır ol bana, günahkerä.
Komkayı lääzım almaa diil böön sade trimurda, diil sade bu oruçta, ama komka var bizä deyni en aazıcık dört oruç hem da taa oruçların arasında da baalim birär kerä. Ölä evelki hristiannarda vardı, ani kim 40 gündän zeedä almȇr komkasını, o sayılmȇr hristian. Te böölä ii atırırlık vardı onnarda, ani saymaa komkayı. Azırlanmaa da lääzım ona! Lääzım komkayı istemää, lääzım susamaa hem acıkmaa komkaya deyni, annamaa, nekadar o bizä paalı.
Amin.
Prot. Feodor Karakalçev
