Bobanın, Oolun hem Ayoz Duhun adına!
Sevgili kardaşlar hem kızkardaşlar!
Panayiyanın yortusu, angısına denyer “Örtü”, angısı bizi koruyer, saklȇȇr herbir fenalıktan, herbir kahırdan, herbir zordan. Neçin deyni istoriyası bu yortunun var ölä. Bir vakıt Greţiyada Konstantinopol kasabasında bir klisedä Vlahernada gecä vakıdı dua edärdi ayoz Andrey kendi üürenicisinnän Epiganiylän. Ayoz Andrey görer, nicä yikarda, bulutlarda gideer Panayiya, gider İoan Vartizedici, gider İoan Allaasözlü, hem varmış bir böllük ayozlar. Ayozlarlan gidärmiş, da birda Panayiya duruklanyer, diz çöker da çekeder dua etmää insannar için. Sora gelyer Prestola, baş iildyer da ordan alyer da yayer Kendi rubasını — omofor, insannarın üstünä, hepsini örter onunnan.
Bu ayoz, angısına görüner Panayiya, ikär kendi üürenicisinä da sorȇr: “Sän gördün Panayiyayı?” O deer: “Bän görerim!” Epifaniy da görer, açan Panayiya bulutlarda gelyer, geçer ayozlarlan bilä. Hep o ayoz, açan sira gelyer ona çıkmaa Gökä, çıkȇr Ray başçasına da orada o bakȇr, göryer çok ayozları, göryer Rayın gözelliini. Göryer, nekadar orada gözäl hepsicii. Ayozlar bulunyarmışlar Allahın sevinmeliindä. Da gözlerinnän hep gezer, hep bakȇr, bekim görecek Panayiyayı. Bakȇr-bakȇr da bulamȇr Panayiyayı Rayda. Açan sorȇr, neredä Panayiya, ona deerlär, ani “Panayiya yok burada. O bulunmȇr Rayda, o gezer erdä da yardım eder insannara”. Panayiyanın izmeti hiç duruklanmadı. Ayozlar da hepsicii bizim için dua ederlär, angellär da. Onnar hepsicii var bizä yardımcı, koruyucu.
Ölä da biz deeriz ayozlara “Скорые помощники и молитвенники о душах наших”, ani onnar var “tez yardımcı hem dua edecı bizim cannarımız için”. Onnar hepsi ayozlar. Panayiya brakılmȇȇr Kendi izmetindän. O çıkmȇȇr Raya, ama burada, erdä gezer da herbir insanın kahırında, zorunda, hepsinä savaşyȇr yardım etmää, kim Onu sayer, kim Onu çaryer yardıma. Hepsinä gezer da getiryer Kendi yardımını. Te ölä olyer Panayiyadan yardım, koruntu bizim için, günahkerlär için, neçin deyni Allaa bizi hepsimizi buyurdu Panayıya, açan geriliydi stavrozda, Panayiyaa sölediiydi İoan Allaasözlü adınnan: “Bundan sora sän varsın Panayiyanın oolu”. Ondan ötää doori da diil sade İoan Allaasözlü, ama biz hepsimiz varız Panayiyanın oolları, angısınnar için o pek çok hem da bitkisiz dua eder hem da çalışyer. Amin.
Prot. Feodor Karakalçev
