04-03 НЕДЕЛЯ 4-Я ВЕЛИКОГО ПОСТА. ПРП ИОАННА ЛЕСТВИЧНИКА
Bobanın Oolun hem Ayoz Duhun adına!
Sеvgili kardaşlar hem kızkardaşlar!
Biz göryeriz, nicä basamak-basamak gideriz Paskellää hem ölä da basamak-basamak bizim Ayoz Klise bizi üüredyer, nicä cenk etmää, nicä kurtulmaa günahlarımızdan. Hepsicii, ne var Klisedä, nicä Ayoz Yazıda da, onnar var Allahtan.
Klise bizä deyni var, nicä uşaklara deyni uşak başçası yada şkola, te ölä bizä var kim bizi üüredyer, savaşyer götürmää sıracıklan. Sıra gelyer küçüklüündän enilk, çekettiynän uşak gitmää şkolaya, onu üüredyerlar bukvalara, üüredyerlar okumaa, yazmaa. Git-gidä yıl-yıldan üürenyerlar taa büük artık taa zor işlärä, angısınnar sorana lääzım olyerlar yaşamakta. Te ölä bizim Ayoz Klisä bizi üüredyer en paalı işlerä – nicä biz cenk kendi günahlarımızlan, nicä biz onnardan brakılalım, nicä biz alışalım.
İlk pazarda bizim Klisä anardı, ani taman oldu hepsicii, Klisää açıldı yol hem Hrostos söledi: “Kuracan Benim Klisemi, da cendemin kapuları da Onu üstelämeyecek”. Kuruldu, erleşti Hristozun Ayoz Klisesi, ötää dooru, kim bulunyer Klisedä, onnar da kurtulyer, kim ayırılmȇr, kim atılmȇr Klisedän.
İkinci pazar bizim Ayoz Klisä üüredyer bizi susmaa, Ayoz Susmaa, ani susarak dua edelim. Neçin deyni dilimizlän biz yapȇrız çok günah. Üürenmää lafetmää var nicä bir-ki yılda, ama susmaa deyni lääzım üürenelim bütün yaşamak. Bu cenk lääzım olsun bitkiyadak.
Üçüncü pazar vardı başiiltmäk Stavroza, nerada Ayoz Klisä bizi kuvetler.
Bu pazar anılyer bir ayoz İoann Merdvenci (Лествичник). O kurdu ölä bir üüretmeyi, angısında insan basamak-basamak çıkȇr Gökteki Padişahlaa. Nicä bu Paskellä Orucunda pazarlar, yaşamakta da ölä basamak-basamak lääzım brakılalım günahtan. Te nicä bir adam, angısı bayıra çıkȇr, nekadar kendindän sıbıdyer nesoy-sa ük, okadar ona kolay olyer çıkmaa yıkarı. Açan bir işi, aar ükü brakȇr, ozaman çıkȇr yıkȇrı. Bölä taa kolay çıkmaa. Te bizä da Yıkarı Gökteki Padişahla çıkmaa deyni lääzım ükleri hepsini brakalım: bir günahtan brakılyerız, bizä taa kolay olyer bir basamak çıkmaa Yıkarı. Bir günahtan taa brakılyerız, genä bizä olyer kolay çıkmaa taa bir basamak. Te ölä basamak-basamak biz çıkȇrız Gökteki Padişahlaa. Amin.
Prot. Feodor Karakalçev
