Bobanın, Oolun hem Ayoz Duhun adına!
Sevgili kardaşlar hem kızkardaşlar!
Basamak-basamak biz gideriz bu Paskellä orucunda hem pek paalı bu basamkları geçelim faydaylan. Neçin deyni basamaklardan var nicä geçmää ozaman, açan nesa diişilyer bizim yaşamamızda. Var nicä durmaa erindä, var nicä gitmää geeri. Ama paalı te o, ani biz azarıcık-azarıcık gideriz ileri. Da Klisä bizi basamak-basamak savaşyer çıkarmaa yıkarı. Nekadar çok üklüyüz, okadar zor çıkmaa yıkarı, okadar o ük çeker bizi aşaa.
Da bu ikinci pazar Ayoz boba Grigoriy Palama, Fessalonikiyski arhiepiskop, üüredyer bizi, hem örnek bizä gösteryer, nicä cenk etmää günahlan, angısına denilyer çok lafetmäk. Neçin deyni dilimizlen biz yapȇrız çok günah.
Grigoriyin bobası geçilyer erken, taa o küçükkana, anası kalyer uşaklarlan da savşyer götürmää dooru yoldan. Da emen olduylan 20 yaşında, anasını hem kızkardaşlarını erleştiryer bir karı monastırä. Kardaşlarını da alyer Ay О́rosa (Afon), gider onnarnan da hepsini başka-başka monastırlerä, orada erleştiryer da kalyer yaşamasını vermää Allaha izmetä. Orada onun varmış üüredicisi — ayoz Nikodim, angısından o çok işlär üürendi hem da üürenyer, nicä bizim Ayoz Klisä söleer, isihazma – Ayoz Susmaa (святое безмолвие).
Ayoz susmak o pek paalı bir iş, neçin deyni susmaa var nicä, açan geeri sölämeeriz, çekişmeeriz, çok lafetmeeriz, boşuna lafetmeeriz, prost lafları sölämeeriz. Yok nicä demää, ani biz dübüdüz brakıldık günahtan, açan bizim fikirimizdä sölenyeriz, kiminnän sa çekişyeriz lafsız, sölämeeriz lafları, ama üreemizdä çekişyeriz, söleeriz geeri, üfkelenyeriz. Açan sa var Ayoz Susmak, insan susȇr da söleer İisuzun duasını. Dua edärkana susmak hem da dua etmäk var pek büük ensemäk, üstelemäk, angısı paalı hem da faydalı iki taraftan da, ani hem susȇrız, söölämeeriz boşuna lafları, dilimizlän günaha girmeeriz hem da ondan kaari dua ederiz. Var nicä demää, ani bu en ii uur, ani olmaa yakışıklı Allaha deyni.
Paskellä orucunun ikinci pazarında bu ayoz bizä bir örnek gösteryer, ani lääzım üürenmää susmaa. Lääzım üürenmää kullanmaa kendi dilimizi. Nicä bir ayoz boba söleer, bizim dilimiz var bir beygir gibi: beygir açan koşulmuş, onu var nicä üüretmää, ona var nicä buyurmaa sapsın saa tarafa, sol tarafa, uz gitsin yada dursun. Açan sa beygir diil koşulu, o gider neray isteer, ona pek zor buyurmaa. Te ölä bizim dilimiz lääzım olsun koşulu. Becermää kullanmaa kendi dilimizi — o pek paalı. Neçin deyni yok nicä çıkmaa Yıkarı, yok nicä çıkmaa Gökä, açan biz becermeyciz kullanmaa kendi dilimizi. Amin.
Prot. Feodor Karakalçev
