Bobanın, Oolun hem Ayoz Duhun adına!
Hristos Dirildi!
Sevgili kardaşlar hem kızkardaşlar!
Böönkü gündä biz bakȇrız te o ayozu, angısı var ayoz Georgiy. Biz işidyeriz, ani ona Allahtan verilmä ad “Победоносец”- “Enseyeci”. O vardı asker. Bobası ölüm kabledyer Hristozun adı için. Hristozun adı için Georgiy kabledyer zeet taa küçükana. Açan Georgiy artık büüyer, 20 yaşında olyer, gider askerlää. Da askerliktä varmış ozaman bir padışaa, angısı pek koolaamış hristiannarı – Diokletian. Ozaman istäärdilär hepsicii baş iiltsinnär yalancı allahlara. Ama Georgiy, angısı hristianin, gelyer da açık inaneder kendi inanını. Padişaha söleer, angı allahları sayer padışaa, onnar diil halizdän allah. Onnar var yalancı allah. Da bunnar için padişaa, nicä herkerä, isteer hem savaşyer, neçin bilyer, ani o varmış onun bir islä askeri, savaşyer aldatmaklan, kär bitki-bitkiyadan teklif eder, ani Georgiy onunnan bilä padişahlık etsin, ani olsun yardımcı. Ama Georgiyi bişeylän aldadamȇȇr. Pek çok türlü zeetlär o çeker: kireçlän gömerlär, balȇȇrlar tekerlää, angısında varmış sivri enserlär. Ama Allah onu koruyer, hepsi onun yaralarını alıştırȇr. Bitki-bitkiyadan sıra gelyer, ani onun keserlär başını. Te bölä zeet o çeker Allahın adı için.
Ama yok bizdä böön ayoz, angısınnar versinnär kendi çanını Allah için, da Allah bişeynän çevirmesin onnara. Allah herkerä hepsinä çevirer. Te o, kim zeet çekti Allahın adı için, onnara Allah verdi nışannarnan taa metinnemää Allahı. Allah verer, ani onnar böön bizim için dua ederlär hem da çok nışannar onnar yapȇrlar, yardımederlär hepsi insannara, kim onnara gelyer, kim çaryer onnarı, kim isteer onnardan yardım. Çok işlär var böön, nedä onnar var yardımcı. Bizä kalyer sade görmää onnarın yardımnarını. Biz görmeeriz kimär serä diil ayozların yardımnarını, ama Allahın da yardımını görmeeriz. Allah nesaydı veryarsaydı, biz sayerız, ani kendimiz nesaydı yaptık, bizim o var izmetimiz, bizim çalışmamız. Da bundan aşırı, te bän kazandım, te bän yaptım, te düzdüm. Yapȇr onnarı hepsiciini Allah. Allah verer. Böön birda insan yok nicä, nicä Allah söleer Ayoz Yazıda da: “Без Мене не можете творить ничесоже!” — “Bensiz yok nicä bişey yapasınız!” O ölä da var. Allah söleer: “Kim sizdän pek var nicä çalışsın da kendi boyunu zeedeletsin bir dirsek kadar?” Yok ölä. Aldın da balabannadın bir dirsek kadar. Ölä olmȇȇr, biz yapamȇȇrız bunu. Yokana açan ekin, o ekini birisi yapamȇȇr, ani o olsun. Bütün toprakta olarsaydı kurak, o olyer. Kimsey, nekadar da çalışsın, yapamȇȇr te onu, neyi Allaa böön var nicä versin bir lafınnan, bir soluunnan, bir küçük kuvedinnän. İnsan bişeylän böön onu zedelämeer, bişey yapamȇȇr, koyamȇȇr karşı. Herbir iş var Allahın. Allah verer. Te o ayozlar da, angısınnar izmet ederlär, onnar var bizä yardımcı. Var yardımcı hem da, nicä Georgiy, söledim, ani var Enseyici. Ama hepsindän büük ensemäk – o var ensemäk kendi günahlarını. Nekadar biz böön yarışyerız! Yarışmak te ondan, ani günahlarını üstelemää — te ondan lääzım herkerä savaşmaa yarışmaa. En büük ensememiz bizim, en büük üstelememiz bizim – o var üstelemäk kendi günahlarımızı, ensemäk kendi günahlarımızı. Onun için da Allah üsteledi en paalı işi, en çirkin işi bizä deyni– ölümü enseyedi. Bizä kalyer sade ensemää kendi günahlarımızı. Amin.
Hristos Dirildi!
Akına Dirildi!
Prot. Feodor Karakalçev
