Bobanın, Oolun hem Ayoz Duhun adına!
Sevgili kardaşlar hem kızkardaşlar, böönkü gündä bizim Ayoz Klisä bakȇr yortuyu, angısına denilyer – “Dozdolay kesilmesi” (Обрезание Господне). Vardı ölä adet çıvıtlarda, Allah sımarlȇȇr prorok Moiseyä, ani herbir çocuk lääzım adansın Allaha, sekizinci günü getirilyer klisä da o gündä olyer bu adet. Angsını sıra geldi da tamannadı Hristos da, Ona hiç diil lääzım bu — kabletsin bu adeti. Ama bozmaa kanonu — Hristos yoktu nicä onu yapsın, O lääzımdı onu tamannasın, ani bulmasınnar onda kabaart, ani te O nesa yapmȇr zakondan. Ama sıra gelyer, kim isteer aaradıynan bulyer, bulyer te orada da, nerada yok. Oradan da var nicä bulmaa, açan isteersin nesa bir zarar yapmaa, isteersin yapmaa bir fenalık, ozaman var nicä islä işlerida, yada islä lafları da çevirmää tersinä, yapmaa ölä, ani bulmaa kabaartlı kimi sa. Ölä da oldu. Hristos savaştı hepsini tamannamaa, bozmamaa zakonu, ama genä, bitki-bitkiyadak, insan Onda aaradı fenalık, aaradı Onda dooru izmetmemäkı.
İkinci yortu, böön ne biz bakȇrız, o var Ayoz Büük Vasiliy, angısı var bizim Ayoz Klisenin Üüredicisı. Ölä da söleer bizim Ayoz Klisä onnara: Büük Vasiliy, İoann Altınaazlı hem Grigoriy Allahsözlü, ani onnar var bizä deyni Dünnenin Üüredicileri.
Hem da ta bir yortu, angısı var böönkü gündä, o bizä deyni var — Yeni Yıl. Neçin deyni şindiyadak yeni yıl çeketmedi, Hristozun duumasından ileri yeni yıl yok nicä çeketsin.
Baktıynan sıracıklan bu yortuları, en ilk böönkü gündä var büük yortu – Dozdolay kesilmesi, ölä söleer bizä gagauzça bizim Ay boba Mihail Çakir. Dozdolay kesilmesi kalyer Eski baalantıdan bizä deyni, gelyer sıra vakıt da onu diiştiryer artık Eni baalantıda – Vartizlik.
İkinci yortu, ani böön biz anȇrız – Ayoz Büük Vasiliy, Dünnenin Üüredicisi, angısı kurdu Liturgiyayi, te o izmeti (служба), angısı böön bizdä olyer. Bütün yılda taa çok İoann Altınaazlının izmetleri bizdä olyerlar, birkaç olyer paskellä orucunda Grigoriy İkisözlünün (Двоеслов) izmetleri – İlerdän ayozlanmış Baaşışlar (Литургия преждеосвященных даров) hem on kerä da yılda olyer Büük Vasiliyin. Onnarda aaz ayırıklık var, sade ani biraz taa uzun saklı duaları Büük Vasiliyin izmetlerindä.
Bizä deyni paalı onun kurması. Onun var yazıları da, kiyatları da var, çok büük izmeti var Ayoz Klisedä. Onun lafları, nasaatları da vardı pek derin. Büük Vasiliyin vakıdında yaşardı bir ayoz, ani böön bizim Ayoz Klisä onu sayer büük bir ayoz – Efrem Sirin. O işidyer, ani var ölä bir arhierey Büük Vasiliy, Efrem Sirin sa yaşarmış yaban erdä da gelyer oradan bakmaa ona, onun izmetini. Açan gelyer da göryer onu, ani Büük Vasiliy gimliymiş böölä gözal rubalara, ona güç gelyer bu işlär. Da o deyer: “Nasıl bu arhierey, böölä gözäl rubalara giynyer? O lääzım kendini uslandırsın”. Neçin deyni baktıynan Altınazlı İoanna, nicä söleer bizim Ayoz Klisä, o kendi varlıını satȇr da daadyer fukaralara, da kendisi yaşarmış bir fukaarä içerdä, bölä kendini uslandıryer. Da açan biter izmet da çekedyer nasaat etmää, Efrem Sirin göryer, nicä Büük Vasilinin azınden çıkȇr ateş hem herbir lavı varmış ateş, ozman o pişman olyer kendi düşünmeklerindä Büük Vasiliy için, gelyer da diz çoker onun önündä da söleer: “ Sän aliz varsın Allahın adamı, Allahın izmetçisi”.
Bän herkerä sölerim hem bana herkerä gelyer aklıma onun lafları, angısınnar var örnek insana deyni bütün yaşamasında, nedän biz böön hepsimz korkȇrız sıra gelyer herbir zeetlerdän, herbir acıdan, açan bizä sıra gelyer kaybetmää varlıımızı, nesa kaybetmişik, nesa bizdä bozulmuş, nesa çürümüş, nesa kapmışlar bizdän, nesa azalyer bizdän, ani nedän sa onnar için pek büük kahıra düşeriz.
Çoyuna ayozlara sira geldi zeet çekmää Hristozun adın için. İsteerlar, ani Büük Vasiliy izmet etsin yalancı üüretmeklärä, ama o atılyer da onu koorkudyerlar, ani koolayacıklar onu topraandan, alaceklar onun varlıını, ölümnen koorkudyerlar.
Da o okadar söleer:” Siz koorkudyersınız beni, ani beni kolayacenız topraamdan, ama neray bän gitsäm hererdä var Allahın topraa! Korkudyersınız beni, ani alacınız varlıımı, ama bendä birki kiyattan kaarı başka bişey yok! Onnan da beni korkutmaycınız! Ölümnen koorkudyersınız, benim güüdäm dayanacek sade biraz, sorana artık duymayacek o acıları. Ölümnen da koorkudasınız yok nicä, neçin deyni o ölüm beni yaklaştıracek taa tez Allaha, Angısınan bän savaşyerım buluşmaa bütün yaşamam”. Te böölä laflar vardı Büük Vasiliyin cuvapı, açan onu çekedyerlar korkutmaa.
Bu laflar okadar derin, angısınnar bizä deyni lääzım olsun örnek, neçin deyni acıdan biz hepsimiz koorkȇrız, çok erdä bunnarlan biz Allahtan atılyerız, unudyerız, varlıımızdan tutunyerız hep bütün yaşamamızda. Taa çok kaçınyerız varlımıza, herbir iştän savaşyerız kaybetmemää, kaçırmamaa. Kimä deyni paalı Hristos, onnara deyni başka işlär var. Açan Hristos paalı, kalan işlär hepsicii var ucuz!
Dozdolay kesilmäk o var örnek te ona, ani biz lääzım ayıralım, keselim kendimizdän hepsi günahları. Te onnarı kendimizdän lääzım keselim da onnara başka geeri dönmeyelim. Ayozlar da hem böönkü gündä anılan Ayoz Büük Vasiliy bizä deyni var örnek kendi yaşamasınnan, kendi izmetinnän Allaha hem kalyer Allaha yaşamasın bitkisinädak sevär Allahı hem da isteer herkerä Onunnan bilä olmaa. Amin.
Prot. Feodor Karakalçev