Bizä deyni İoann Vartizedicinin yaşaması örnek, nıcä izmet etmää doorulaa. Neçin deyni biz nerada sa varız yalan — “Всяк человек есть ложь”. Alizdän da herbir insana yok nicä olmaa yakışıklı, neçin deyni birinä uyduryarsaydın, öbürü gücenyer, ona uyduryarsıydın, bu gücenyer. Hererdä yok nicä olmaa herbir insana yakışıklı, lääzım olmää yakışıklı Allaha. Bilyeriz, ani yalan diil lääzım sölemää.
Herbir uurda İoann Vartizedici var bizä deyni örnek. Nışan İoann Vartizedici yapmadı, ama onun bütün yaşaması var nışan, okadar derindi onun lavları, okadar çetindi lavları, ani hepsici onu seslärdi hem da o birsindän korkmardı, sölärdi birdän herbir işi nicä var alizdän. Aylandırmardı hem da ikiüzlülük yapmazdı herbir işa deyni.
Bizdä olyer şiretlik Allahın önündä, biz savaşyerız kendimizi dooru çıkarmaa, açan neçin sa gelmemişik klisä, açan nesa yapmamışık. Ama alizdän en çok lääzım isteyelim kendimizdän, ama bän lääzım te böölä yapım, bän lääzım te böölä kendimi götüreyim, bän lääzım te böölä söleyim. Te ölä lääzım olsun yaşamakta. Ama demää, ani bu için bizi seveceklär – sevmeyeceklär! Dooruluk için kimsey sevmeer! Dooruluk için herkerä sıra gelyer zeet çekmää. Hristos ölä da söleer: “Ne mutlu te onnar, kim dooruluk için koolanyer”. Kim dooruluk için koolanyer, onnar ne mutlu, ama dooruluk için sıra gelecek koolanmaa, Allah onu söleer. Onuştan, bizä sıra gelecek dooruluk için zeet çekmää. Ama Gökteki Padişahla yok nicä başka türlü girmää, yok nicä yalancılıklan, yok nicä aldatmaklan, yok nicä bişeylän girmää, neçin deyni Hristos var Kendisi Dooruluk. Biz ölä da söleeriz: “Христе, Свете Истинный…” – “Hristos var Alizdän Hakikat Şavk ”. Gökteki Padişahla lääzım girmää sade olduynan Allahın önündä hem da kendi esabımızın önündä savaşmaa dooru izmet etmää. Amin.
Prot. Feodor Karakalçev