Bobanın, Oolun hem Ayoz Duhun Adına!
Sevgili kardaşlar hem kızkardaşlar,
böönkü gündä biz anȇrız bir ayozu, angısı var anılma her bir toprakta hem diil sade bizim hristiannarın arasında, ama yabancı inanda insannarın arasında anılyer, necin deyni çooyu ona gelyer, yardım isteyer. Bekim onnar başka dindä bulunyerlar, ama çooyu zoorlarında, kahırlarında isteyerlar yardım bu ayozdan — Ayoz Nikuldan.
Bizim Ayoz Klise söleer ölä, ani o var inanın örnää hem da usluluun siması.
Ayozların kahırı vardı salt bir iş, ani nasıl ölä olsun, ani yaklaşsınnar taa zeedä Allaha hem da taa tez gelsinnär karşı Allahlan. Hepsinin vardı kendi izmeti, Ayoz Nikulun da vardı kendi izmeti, o araardı Allahın dooruluunu, ani Allaha izmet etmää, insanı üüredyardi doorula. Ondan kaarı o yardımedärdi insannara. Biz bilyeriz onun çok işlerini, çok izmetlerini, ani yardım eder fukaralara, ani kimi sa emen lääzım öldürsünnär o durgudyer, ölümdän kurtaryer, kim sa bulunyer denizdä, angsı taman buulacek, onnarı çıkaryer. İnsan onu bu iş için da sevärdi.
Sira gelyer da onu indiryerlar arhiierey sanınıdan, onun için, ani canı acıyer, ani kötülerlär Hristozu, ani Hristozu saymȇrlar Allah. O uryer te o Ariya bir şamar, böölä onda vardı kıskanç. Bilyeriz, ani ona görünyer, ani gelyer Panayıya, veryer ona omofor — arhiierin rubasın payı, Hristoz veryer ona Evangeliyayı. Onu genä koyerlar arhiierey, genä olyer kendi izmetindä, nicä vardı şiniyadak.
Te bölä bizä deyni Ayoz Nikul var örnek. Biz diil lääzım sade ayozlardan isteyelim yardım, ama lääzım bakalım onnarın yaşamasına da. Açan biz taşıyerız o ayozların adlarını, biz lääzım onun yaşamasınada savaşaşım benzemää: raz o benim ayozum, raz bän onu sayerım, raz benim adım o ayozun adında, bän lääzım bakım, nicä o yaşaardı, nicä o yapardı, neylän o Allahın önünä çıktı, angı iliklärlän, neylän o oldu ayoz, bän lääzım savaşayım almaa ondan örnek da benzemää kendi ayozuma ikär ölä, ani sıra geldiynen karşı gelmää Allaha, ani bän da olayım Allahın ayozların arasında. Amin
Prot. Feodor Karakalçev