Bobanın, Oolun hem Ayoz Duhun adına!
Sevgili kardaşlar hem kızkardaşlar!
Stavroz için bizim ayoz Klise söleer ölä, Stavroz var koruycusu bütün dünnenin, Stavroz var Klisenin gözellii, angellerin var metinnii hem da şeytannarın var yaraları. Biz böönkü gündä göreriz klisenin orta erindä Stavrozu, angısı düzülü çiçeklärlän, gözäl. Ölä dä lääzım olsun. Nekadarsa böön yapȇrız stavrozumuzu, nekadarsa böön sayerız, taşıyerız kresti kendimizdä, nekadarsa bilyeriz Stavroz için, ani onda gerildi Hristoz. Ama biläydik bütün derinniini Stavroz zeetlerini, angısınnarı sıra gelsi çekmää Hristoza, biz böön kıyıştırmayaceydık çok işleri yapmaa: geç kalmaa klisää, lafetmää klisedä, telefonnarı unutmaa sündürmää klisedä hem başka.
Bakalim te o vakıda, nezaman stavroza gerärdilär insannarı da biraz bakmaa, nelerdän sıra gelärdi onnara geçmää. Stavrozda gerärdilär hepsindän büük hırsızları, en büük fenaları. Açan Hristoz geldi erä, ozaman çıvıtların topraanda bulunardılar rimlännar. Onnara deyni stavroz vardı okadar çirkin, ani kim rimlänin, o yok nicäydı käär fikirindän geçirsin bölä büük cezayı, ani gerilmää stavrozda, neçin deyni o geçirdiynän sade aklından, onun fikiri bulanardı. Bakasaydık Ayoz Yazıyi, göreriz, ani apostol Pavel vardı rimskiy vatandaş. Da açan sıra geler zeetlemää, göreriz, ani çooyunu gereerlär. Deyeciz, ki apostol Andrey İlkçarılmış, onu gererlär stavrozda. Apostol Petriyi gererlär genä stavrozda, ama o sayer kendini, ani o diil lääzım gerilsin Hristoz, o deer, gerin beni tepesiüstü, ayaklarım olsun ikarda, başım da olsun aşada. Açan sıra geler cezalamaa apostol Pavelı, onu, nicä rimskiy vatandaşı, onu yok nicäydı gersinnär stavroza, apostol Pavelın keserlär başını.
Hristoz brakȇr hepsiciini, sever Kendi insanını. Okadar ana sevmeer kendi uşaanı, nekadar Allaa sever hepsi insannarı. Hristoz unudȇr zeetleri. Ama biz diil lääzım unudalım. Bizim aklımızda onnar lääzım herkerä dursunnar. Biz lääzım herkerä tutalım aklımızda te bu zeetleri, angısınnarı biz sade işidyeriz, biz onnarı kendimiz geçirmeeriz. Onun için bizä var cumaa, çarşamba, angısınnarı biz lääzım bakalım. Adi var nicä oruçları bakmamaa, var nicä klisä gelmemää bir kerä, var nicä geç kalmaa, käär geç kalarsaydık, bişey diişilmeyecek, var nicä lafetmää klisedä, slujba gidärkän. Bunnarı hepsini baaliim biraz geçirdiynän fikirimizdän hem da üreemizdän, nelär yaptı bizim için Hristoz, biz onnarı kıyıştırmayacez yapmaa halizdän dä. Kıyıştırmayacez geç dä kalmaa, kıyıştımayecez lafetmää dä klisedä, günaa yapmaa, eer olarsaydık biraz şüküredici. Biraz şükür etmää, bizim için bu zeetlär çekildi, biz çok işleri kıyıştırmayacez yapmaa, eer halizdän ürektän onnarı geçirärsaydık.
Stavrozdan aşırı bizä geldi kurtuluş. Onun için dä böön biz Stavrozlan kullanarak, yaparak stavrozumuzu, baş ilderäk ona, kablederiz kuvet, ölä dä söleer apostol Pavel «Крест для погибающих юродство», kim ani gideer kayıba, onnara deyni Stavroz var fikirsizlik. Bizä deyni, kim arȇȇr kendinä kurtuluş, onnara deyni o var Allahın Kuvedi. Amin.
Prot. Feodor Karakalçev
