Bobanın, Oolun hem Ayoz Duhun adına!
Böönkü yortu var hem sevinmäk, hem var kahırlı. Kahırlı, neçin deyni girmää, bileräk, neredä seni ya kötüleyeceklär, ya düyeceklär, ya ölümä vereceklär, ya zeetleyeceklär, neredä seni utandıraceklar, orayı gitmää. Herbir insan, varsaydı onda ölä kolaylık, o gitmeyecek. Savaşacek ölä erä gitmemää, bileräk, ani orada ona fenalık yapaceklar, zeetleyeceklär, biz ölä erä çalbalmaa gitmeycez.
Sevinmelik yortu bu taraftan, ani Hristoz geldi tamannamaa. O geler yapmaa, ne için geldi. O biler, ani geldi kurtarmaa Kendi insannarını. Bunun için o sevinmäk. Bizä deyni o sevinmäk, Allaha deyni dä o sevinmäk, neçin deyni O geler kurtarmaa Kendi insanını.
Ama ne paasınnan? Ne ödek sıra geler ödemää bu iş için, ani insanı kurtarmaa deyni?
Sıra geler vermää Kendi Canını, vermää Kendini zeetlerä. Bu herkerä bizä taa bir kerä getirer aklımıza, angı ödeklän bizä geldi Kurtuluş. Sıra geldi vermää Canını, sıra geldi vermää Allahı zeetlerä, ani insanı kurtarmaa deyni.
Bunu yapaciykan, ilersi günü Hristoz ilk dirilder Lazari ölülerdän. Gireceykän İerusalimä, O geldi Vifaniya, neredä yaşardı Lazar kendi kızkardaşlarınnan. Orada Lazar ölyer. Da O Lazari dirilder ölülerdän. Bir taraftan, gösterer bizä, nicä söleer bizä böönkü tropar “Biraz ileri Kendi zeetlerindän, Sän dirilttin Lazari, ani göstermää Kendi üürenicilerinä, ani Sendä var bölä kuvet”. Üürenicileri dä şüpää düşmesinnär, kahıra düşmesinnär, açan göreceklär Hristozu zeetlenärkän, onnar kaybetmesinnär kendi umudunu, kaybetmesinnär kendi inanını.
Hepsimiz biz umut edärdik, neçin deyni böönkü gündä, açan Hristoz girer İerusalimä, göreriz, ani hepsicii insannar gelerlär orayı yortuya. Angı yortuya gelerlär? Gelerlär Paskellä yortusuna, neçin deyni altı gün ileri hepsi adamlar lääzımmış gelsin te bu yortuya, Paskellä yortusuna. Gelärmişlär hepsicii İerusalimä, orada vardı klise. Da hepsi gelerlär orayı. Da onnar gelerlär biraz ilerdän. Hristos eşek üstündä girer İerusalimä, ozaman çıkȇrlar, da hepsicii keserlär aaçlardan dal da döşerlär erä, kimisi döşeer, çıkarıp, rubalarını. Hepsi karşılȇȇr Hristozu “Осанна в вышних, Царь израилев”.
Hristoz girer çıvıtların halkına bir taraftan, bir taraftan da girer bizim cannarımıza. Girer Kendi bütün usluluunnan, neçin deyni Allaa herkerä üreemizä girer diil ozaman, açan orası kitli, da O girer kırarak. Allaa herkerä girer uslu. Girer sade ozaman,açan insan açȇr kendi üreeni. Ozaman Hristoz girer insanın üreenä.
Da te ölä Hristoz girdi käär eşek üstündä, neçin eşek, bir taraftan, o var uslu hayvan. Übür taraftan da sölener ölä: Allaa geldi uslandırmaa yannışlıklarımızı. Kimär kerä biz söleeriz, ani yannış nicä eşek. Bizim yannışlıklarımızı geldi uslandırmaa Hristoz.
Te bu yortu, angısını biz böön bakȇrız, yortu, angısınnan Hristoz girer zeetlerä, 6 gün ileri, etişmedään Paskellää… Canı acıyer, söleer, İerusalim, İerusalim, nekadar Bän savaştım sizi toplamaa, nicä kloçka toplȇȇr kendi piliçlerini, ama siz istämediniz. Onun için kalyer sizin eriniz boş. Biler, ani girer zeetlerä, biler, ani zeetleyeceklär, ama biler, ani bunnan O getirecek kurtuluş Kendi insanına. Te onun için, alyer Kendi üstünä te bu ükü, girer İerusalimä, ani çekmää zeetleri, kurtarmaa Kendi insanını. Amin.
Prot. Feodor Karakalçev