Проповедь в день первой Литургия Преждеосвященных Даров
Açan biz birazçık azırlanyerız, birazçık kendimizi zeetleriz da sıra gelyer Komka almaa, alizdän da göryeriz, nekadar O tatlı, nekadar ii Saabi. “Dadın da iyin, da annayın nekadar ii var Saabi”.
Biz böön bulunyerız Paskellä orucunda, oruç bizä deyni — ayırmaa bizi erdän da kaldırmaa bizi nekadarsa yıkarı. Oruç bizä deyni te ona, ani ayırılalım erdän, ayırılalım erdeki işlerdän da çıkalım biraz yıkarı, da görelim Allahı. Görelim te onnarı, ne Allaa bizä azırladı hem da nicä Allaa bizä bakȇr, nicä Allaa bizi göryer, nicä Allaa bizim için çalışyer.
Herbir islä işä deyni lääzım olsun izmet. Bizä deyni da, aldıynan erdeki işleri hem da açan biz alyerız canın tarafını, açan Hristos deer, ani “Gökteki Padişaalık izmetlän kazanılyer”, biz şüpä da diil lääzım düşelim, ani lääzım mı te bu oruçlar.
Açan biz biraz ayırmayacız kendimizi yaanıdan, açan biraz ayırmayacız kendimizi süttän yada başka imäklerdän, bizä da böön etişmää neyasa yok nicä. Te o var kücücük bizim izmetciimiz, bizim kurbanımız.
Eer aldıynan canın tarafını, bizdä bırada da lääzım olsun izmet. Diil sade imäk tarafından, işlerimizin tarafından da, gözlerimizdän da dilimizdän da, kulakalrımızdan da her bir iştän. Ama Allaa kabledyer, ani biz çekedyeriz böön kendi izmetimizi imektän. Ani imeeriz, savaşyȇrız korunmaa kimsi imäklerdän. Açan küçük iştä biz diiliz becerekli, büük işi bizä kimsey vermiycek. Onuştan oruç o var küçük işçääz, açan biz bunu becermeyeciz, açan bunu istämeeriz yapmaa, ozaman büük işi bizä Allaa inanmayacek. Bunu ne yapa bilyeriz, lääzım savaşmaa yapmaa. Oruç tutaarkana lääzım cenk edelim kendi günahlarımızlan. Da açan olyer o da bu da, ozaman gelyer meyvalar, nicä söleer Apostol Pavli: can meyvaları var sevgilik, sevinmelik, usluluk, çokdayanmak…
Prot. Feodor Karakalçev
