Bobanın, Oolun hem Ayoz Duhun adına!
Sevgili kardaşlar hem kızkardaşlar!
…Açan okuyerız Evangeliyayı, biz göryeriz orada, ani o adam varmış dooruluklu, ii inanlı. Baktıynan çıvıtlara, onnar, angısınnar savaşardılar dooru kendisini götürmää, savaşardılar hepsini adetleri yapmaa, onnara okadar paalıydı yapmaa hepsiciini Allahın zakonunda, ani bişey siviştirmemää, bişey diiştirmemää. Ama o vardı Eski Baalantının zakonu. Kendibaşına o yok nicä kurtarsın. Var bizdä taa Eni Baalantının zakonu, angısı için Hristos söleer: “Açan sizin dooruluunuz geçmiyecek te o kiyatçiların dooruluunu, te o fariseylerin dooruluunu, ozaman siz kurtulmayacenız.” Evelki zakon – o yapmamaa fenalık. Ama yapmamaa fenalık o aaz. Biz açan kimär kerä söleeriz, bän te birisinä yapmȇrım fenalık, savaşyerım kimseynen baarışmamaa, kimseyä bişey sölämemää. Käär spiyadada söleeriz, yok günahım benim. Ama yapmamaa fenalık – o sade yarısı, käär, var nicä demää, diil yarısı da zakonun. Biz herkerä burada işidyeriz 33-cu psalomu, orada sölenyer “Уклонись от зла и сотвори благо”. Onun var ikinci payı. YApma fenalık da yap iilik. Eni Baalantının zakonu – o var yapmaa iilik. Diil sade fenalık yapmamaa, ama lääzım yapmaa iilik da.
Bu böönkü istoriya, angısı var Simeon için, işidyeriz ani denilyer «Сретение – Встреча», denilyer “Karşı gelmäk Hristozlan”. Nicä apostolda da okundu: “…больший меньшим благословляется…” Herkerä büüklär iisözlerlär küçükleri. Burada olyer, diil Simeon tutsun Hristozu kucaanda, ama Hristos tutȇr Simeonu.
Açan Solomon da söläärdi: “Allahım nicä bän Sana düzecäm ev, klise, (ilk kliseyi düzdü Solomon), açan Sän Göklerä sıymȇrsın. Nicä bän Sana erdä düzecäm ev? Sän Göklerä sıymȇrsın, ama burayı sıyacan.” Ama Allaa sıyer. Allaa sıyer klisä, angısını düzer Solomon, böönkü kliselerä da hepsinä.
Allaa sıyer Simeonun kucaana, orayı da sıyer Allaa.
Allaa sıyer ahıra, nereyi Panayiya koyer, duudunan.
O sıyer bizim içimizä, açan biz komka alyerız, O girer bizim içimizä dä. “Невместимый Бог вмещается в то маленькое сердце”. Käär te o küçük bizim üreemizä, Allaa orayı da sıyer, eer biz orasını açarsaydık. Te olȇr karşı gelmäk Allaylan.
O mutlak olyer yaşamamızda. Kim böön istämeer gelmää klisä, kim böön sayer kendini, ani ona O diil lääzım: bän taa genç, lääzım te o işi yapıım, lääzım kazanıım, taa evlendim şini, lääzım almaa maşina, lääzım ev düzmää.
Allaaylan karşı gelmäk olȇr hepsindä, neçin deyni hepsicii mutlak karşı geler zorlarlan… Kimär kerä, açan nesa oldu bizimnen, Allaa geldi bizä yardıma, da biz onu tutȇrız aklımızda, çekederiz şükür etmää Allaha, brakȇrız öbür işleri, koymȇȇrız onnarı ilk uura, koyerız onnarı Allahtan sora. Te ozaman bu karşı gelmäk oldu. Hem o var, hem ilerleer, neçin deyni karşı gelmäk oldu, Allaa geldi bizim üreemizä da kaldı bizim üreemizdä. Te o karşı gelmäk, angısı lääzım bizim yaşamakta olsun. Simeon Dooruluklu deyni bir iştä var sade kısmet – görmää Hristozu Allahı. Amin.
Prot. Feodor Karakalçev