Bobanın, Oolun hem Ayoz Duhun adına!
Böönkü gündä biz anȇrız Büük Vasilii. Dozdolay Kesilmesi böönkü gündä artık yok bu adet, neçin deyni onu diiştirdi bizdä Vartizlik. Vartizlik var taa paalı, taa önemli. Te onun için apostol söleer: “Обрезание ничто и необрезание ничто”. O kaybetti kendi kuvedini, neçin deyni onu diiştirdi taa büük tainstvo, angısına deniler Vartizlik.
Böön dä biz anȇrız bir Ayozu, angısı var Büük Vasilii. Klise onnarı anȇr üç ayozu: Üüsek Vasili, Grigorii Allahsözlü hem İoann Altınazlı. Onnar üçü var Vselenskiy üüredicilär. Onnardan böön kaldı çok üüretmäk. Baktıynan İoann Altınazlıya, o vardı bir üüredici, angısı sevärdi fukaarilii. Kendisi zengin ayledän, ama açan kalyer arhierey, ozaman gideer da daadyer vaarlıını fukaarelerä. Kendisi dä kalyer bir küçük içerciktä da orda kendi yaşamasını geçirer duada.
Büük Vasilii, o da vardı zengin. Çalışardı Klise için, savaşardı Klisedä olsun taa paalı işlär: ikonalar olsun, ikonostas. Onadan ikonostas yoktu Klisedä. Büük Vasilii koyer, ani Klisedä olsun ikonostas. Hem da ikonolar vardılar paalı, zengin. Savaşardı düzmää Kliseyi zengin, olsun paalı hepsicii, gözäl olsun Klise. Onnar ikisi dä yoktu biri-birinä aykırı olmaa. Biri sayardı, ani Allaha deyni ona bişey diil lääzım, ona etärdi olsun sade Hristoz. Başka bişey diil lääzım. Öbürü, nicä düşünärdi, ani Allaha deyni lääzım vermää hepsindän isleleri. Nicä bileriz, ani çıvıtlarda da vardı ölä sımarlama, ani Allaha getirersin kurban, getir hepsindän isleyi. Ne sendä var, ondan al en isleyi. Da onnar biri-birinä aykırı olmazdılar: ne İoann Altıazlının yaşaması, ne Büük Vasiliyin yaşaması. Onnar yakışıklı vardılar Allaha. Vardı bir Ayoz, angısı yaşardı yaban erdä, daada. Da açan o işider Büük Vasilii için, o isteer, gelip, görmää onu. Geldiynän, açan görer, ani o böölä zengin rubalarlan giimni, nasıl bu, deer, ayoz adam. Da açan sora çıkȇr propovedä Büük Vasilii, görer, nicä, sölärkan propovedi, onun aazından çıkȇr ateş. Ozaman annȇȇr kendi yannışlıını. Slujba bittikçä, girer af olmaa İoannan. Halizdän dä görer, ani bu var bir ayoz adam.
Te böölä, insana deyni, angısı kendini koyer izmetä Allaha, kim görer, ani Allaa ona deyni var paalı, o zengin dä olsa, zenginnää baalanmȇȇr, fukarä dä olsun, gücenmeer fukarilik için, neçin deyni ona deyni var en paalı Hristoz. Te onun için, zenginnii dä var nicä kullanmaa iilää dooru, var nicä fukaarilii dä, herbir işi. Bişey yok köstek. Ama zenginnik taa sıkca olȇr bizä, ani biz bilmeeriz zenginnii kullanmaa. Amin.
Prot. Feodor Karakalçev