Bobanın, Oolun hem Ayoz Duhun adına!
Sevgili kardaşlar hem kızkardaşlar, Evangeliyada Hristos söleer, ani olsun inanınız. Herbir olyarsa bir ardal tenesi kadar inanınız, da deyarsınız te bu bayıra kalksın da aktarılsın denizä, inanıza göra olacek.
İnan, angısı böön bizdä hepsimizdä nekadar sa var, pek yufka. Onu Allah bizä gösteryer hem savaşyer kaavileştirmää ayozların yaşamasınnan, örneklän ayozlardan, angısınnar ölä geçirdilär kendi yaşamasını, ani gösteryerlar bizä böönnen-böön örnek nicä bizä lääzım olmaa, nicä lääzım kendimizi götürelim.
Da böönkü gündä anılyer ayoz zeet çekän Trifon, angısı yaşaardı üçüncü üzyılda. Küçüklündän taa o vardı izmetçi Allaha. Bir kerä, açan insannarı beklärmiş aaçlık, ekilmiş terekeyi çekedyer imää böceklär, da ayoz Trifonun dualarınnan hepsicii böceklär kaybelyerlar. Vardı onda ölä kuvet Allahtan koolamaa şeytanı: padişahın kızını alıştıryer, koolȇȇr ondan şeytanı. Odek o istärmiş okadar: inan Saabi İisus Hristoza, başka taa büük ödek birisindän istamazmiş.
Açan diişilyer padişa, olyer başka padişaa Dekiy, o vakıtlarda hristiannarı kooladılar. Da haberlerlär padişaya, ani var te böölä te bir adam angısı inanyer Hristoza hem çoyunu savaşyer çevermää Hristoza. Padişahın izininnän getiryerlan ayoz Trifonu ona, veryerlar türlü-türlü zeetleerä: koolȇȇrlar ateşlän, aşlȇȇrlar onu, sıra gelyer enserlär ayakkablarında kakıp gezdiryerlar onu. Başka çok türlü zeetlär ona yapȇrlar da bitki bitkiyadak veryerlar onu ölümä, keseciykana onun başını, o taa ileri veryer kendi canını Allaha…
Prot. Feodor Karakalçev
