Проповедь в день Усекновения главы Иоанна Предтечи
Bobanın Oolun hem Ayoz Duhun adına.
Sevgili kardaşlar hem kızkardaşlar!
Böön bizä deyni var küçük cumaa. Büük cumaada gerildi stavroza Hristoz. Böönkü gündä İoann Vartizedici kabledyer ölüm. O var en büük insannarın arasında.
Neçin kableder ölüm?
İnsannarın fenalıın için, dangaklıın için, insannarın azıtması için.
Bu işlär oldular, neçin deyni İrod padişaa yaptı bir konuşka, nerada bakardı duuma gününü. Burada pek çok günaa toplanyer. Kimär kerä biz söleriz, ani bilmedään yaptık günaa, ama bilmedään günaa bizdä pek az olyer, taa çok günahlar olyer bilä-bilä…
Bizdä hepsimizdä var izmet erdä. Herbir izmetin lääzım olsun te o tarafı, nerada bizim esabımız söleer, nicä lääzım yapalım. Diil lääzım hepsimiz böön olalım popaz yada monah, hepsi böön lääzım olsun hristian. Eer sän böön işlersan şkolada üüredici, üüret, götür kendi işini dooru!
İşleersan bolniţada alıştırıcı, götür kendi dooru.
İmäämi yapȇrsın nerada sa, götür orada kendini dooru. Esapcasına yap, ne duşer yapmaa.
Ustamı işlersin, orada götür kendi dooru.
Herbir erdä lääzım olsun, nicä düşeer.
Biz böön yapȇrız metaniye annamızda oluncak şiş. Yada aarȇȇrız, angı duayı okuylum, angı akafistı. Nerayı gidelim ii vergi için (благодать)? İi vergiyi diil lääzım nerada sa aramaa onu. İi vergi bizim üremizä iner ozaman, açan biz iildyeriz başımızı da yapȇrız herbir işi insancasına, götüryeriz kendi işimizi esapçasına. Var mı senin işin süpürmää nerasını sa, süpür esapçasına, olsun kırnak hem pak, esabına görä. Var nicä böön akafist okumaa, onu biz böön hepsimiz var nicä okuylum, onu lääzım da okumaa, monastırä da gitmää o diil prost. Ama açan bän oray giderim da kendi işimi yapȇrım ötää beri, ozaman neradan bana var nicä gelsin ii vergi? Gelmeyecek o bana, istärsan dizçä dur bütün gün da oku akafist, faydası yok. Açan sän kendi işini getiryersin ötää beri, açan esapsız götüryeriz kendi işimizi.
Onuştan İoann Vartizedici var te nerada örnek: bilyardı, ani kapayacıklar, bilyardi, ani var nicä öldürsünnär da, ama izmet edärdi doorulaa, neya onu Allah çaarmış, neya Allah onu yollamış, ona o izmet edärdi esapçasına.
Biz da lääzım izmet edelim ölä. Bizä deyni böön eter olalım yakışıklı Allaha, eter olsun usluluumuz. Aramaa nerada sa diil lääzım. Lääzım arayalım kendi üüremizdä, kendi fikirimizdä hem da kendi esabimizda, orada aararsak, biz ikär bulacız. Bulyarsak, o var erdeki izmetimiz, angısı herbir insana deyni var iilää hem da kurtuluşa deyni.
Prot. Feodor Karakalçev
