Bobanın Oolun hem Ayoz Duhun adına!
Sevgili kardaşlar hem kızkardaşlar!
Açan Hristoza sıra gelyer, bilyarkana, ani O ertisi günü geçilecek, verilecek zeetlerä, ilersi günü O yapȇr en paalı işleri. Bilyarkana, ani sabaa lääzım zeetlensin, verilsin elä da stavroza gerilsin, kabletsin ölüm, böön O alatlȇȇr yapmaa, ne var hepsindän paalı – O kurȇr Komkayı. Toplȇȇr üürenicilerini avşam sofrasında da veryer onnara orada Komkayı, angısını kurȇr da ötää dooru böönkü günädak bizdä hem da dünyä bitincek herkerä o komka var hem da olacek.
Ölä lääzım olsun herbirindä, herbir arif çorbacı, herbir insan herkerä en paalı işleri lääzım koysun en ileri. Biz yaklaştık üçüncü pazara, angısı azırlȇȇr bizi paskellä orucuna. İlersi günü biz anȇrız hepsiciini, kim bütün dünyanın kurulmasından beeri geçildi bu dünyadan. Ölä kurȇr bizim Ayoz klisä, ani hepsiciini anmaa, neçin deyni sabaakı gündä bizim Ayoz Klisä anȇr Evangeliyayı, nerada Hristos annadyer Koorkulu Dava için (О Страшном Суде), ne olacek o Davada, Allah söleer, nicä ayıralacek birazı insannar saa tarafana, birazı ayıralacek sol tarafana. Nicä çoban ayıryer koyunnarı hem keçileri, te ölä olacek, açan sıra gelecek Hristoza gelmää da Daava kesmää insannara. Böön biz anȇrız ölüleri, herkerä lääzım tutalım aklımızda, herkerä lääzım dua edelim onnar için.
Onun için biz lääzım dua edelim ta etişmedän Hristozun Koorkulu Davasına onnar için, kimin günahları taa prost olmadı, kim bulunyer zeetlerdä, zorlarda. Neçin deyni açan olacek artık Hristozun Koorkulu Davasında, ondan sora yok nicä bişey diiştirmää. Allah bizi çaaryer, Klisä bizi üüredyer, ani biz lääzım dualarımızı getirelim şini, unutmayalım onnarı, kim geçildi bu dünyadan. Amin.
Prot. Feodor Karakalçev
