Herbir izmet herkerä olyer kösteklän. Yok ölä izmet Allaha deyni kösteksiz. Kimärkerä söleeriz: “Nesa savaşyerım yapmaa dooru da kabartlı kalyerım”. Buna diil lääzım şaşalım, neçin deyni biz onu ayırdık, açan istedik olmaa hristian. Biz onu ayırdık, açan istedik gelmää klisä. Biz onu ayırdık, açan istedik tutmaa oruç, almaa komka – biz o köstekleri kendimizä ozaman da ayırdık.
Apostol Pavli ölä da söleer: kim izmet eder Allaha, o lääzım azır olsun zeetlerä. Kim isteer izmet etmää Allaha, herkerä koolanacek.
O herbir vakıtta vardı. Baktıynan Büük Vasiliyin yaşamasına, padişaah savaştı onu koolamaa: en ilk çevirmää yalancı inana, çok türlü savaştı onu korkutmaa. Herkerä ona olyardı kösteklär yaşamasında, açan izmet edärdi Allahın Klisesinä.
Grigoriy Allahsözlüyü aldıynan, ona da pek çok kösteklär oldu yaşamasında. İoann Altınaazlıyı sıra geldi pek çok yolladılar uzak erlerä (ссылки), ani olsun yakışıksız onun yaşaması. Te ölä te hepsi geçiryerlar yaşamasını.
Bakarak ayozlara, biz böön istärsak kendimizä raat yaşamak te onadan, ani biz böön gelyeriz klisää, bizä herbir taraftan pek uysun — o diil dooru. Biz ayırdık Allahı, bizä deyni herkerä olacek köstek, neçin deyni şeytan savaşyer herbir uurdan kösteklemää.
Hem da Hristos en ilk ne söleer? Söleer, ani nekadar yakın insannarımız var, okadar çok onnardan olyer bizä köstek (Враги человеку домашние его).
Herkerä sıra gelyer nerada sa kiminnän sa işleersin mi, savaşyersın kendini dooru götürmää, savaşyersın yalancılık etmemää, savaşyersın dooru nesa sölemää, orada sendän azetmeerlär. Herkerä ölä vardı, neçin deyni şeytan isledän azetmeer, şeytan iiliktän azetmeer, şeytan dooruluktan azetmeer. O onun için da savaşyer dürtmää yakın insannarımızı, kiminnän işleeriz, kiminnän yaşȇȇrız, bizim uşaklarımızı, bobamızı-anamızı, kocamızı, karımızı — onnardan şeytan savaşyer bizi kösteklemää.
Te ölä olyer bütün yaşamak. Açan biz böön ayıryerız izmeti Allaha, ozaman bizä lääzım olmaa azır kösteklerä, koolamaklara.
Hristiannarı herkerä kooladılar. Böönnän- böön istemää, ani ev içindä sana biri bişey demesin – ölä olmeer, komuşular nesa sana bişey demesin, ölä da olmȇr.
Beklemää, umut etmää, ani izmetedärkana Allaha, bizä olamaycek köstek, ölä yok nicä olsun. En ilk örnek bizä var Hristos. O dooruluk için çekti zeet, dooruluk için döktü kanını, dooruluk için gerildi stavroza, dooruluk için sıra geldi kabletmää ölüm. Sade bir dooruluklarlan, sade iiliklärlän. Biz sa ayırdıysak Hristozu, nicä Hristos deer: “Beni kooladısıdılar, sizi da koolayaceklar.”
Kösteklär bizi paklȇȇrlar günahlardan. Bän yok nicä gideyim Allahın yolundan, bän yok nicä izmet edeyim Allaha, neçin deyni en ilk bän lääzım annayım, ani bän varım günahker. Neçin deyni karşı biri-birinä duryer diklik hem usluluk. Şeytan enseer dikliklän, hristian sa var nicä üstelesin usluluklan. Bir neylän var nicä üstelemää şeytanın cengini sade usluluklan. Eer o bizdä var sa, o olyer, yok sa ozaman bän annamȇȇrım, bän tanımȇȇrım, ani bän varım günahker. Açan bän tanımȇȇrım, ani bän varım günahker, bän Allahın yolundan yok nicä gideyim.
Te ölä hepsicii ayozlara sıra geldi geçmää çok işlerdän, ani olmaa Allahın yanında. Bizim yolumuzu, angısı verildi bizä Allahtan, lääzım geçirelim kösteklärlän, herbirinnän hem bitki-bitkiyadak üsteleyip, enseyip kendi günahlarımızı, kendi zeetlerimizi, ani bizä da sıra gelsin çıkmaa Allahın önünä te o baaşışlarlan. Te o baaşışlan, ani Allahtan: “Gelin kim, ani iisözlü-insannarım kabledin Gökteki Padişaahlı”.
Amin.
Prot. Feodor Karakalçev
