Allah gelyer hepsiciinä insanara da getiryer bereketini. İoann Vaartizedici söleer: “Bän sizi vaartiz ederim suylan, var sizin aranızda Kim sa, Angısı vaartiz edecek sizi Ayoz Duhlan”. Kim vaartiz edecek Ayoz Duhlan, en ilk lääzımdı kabletsin vaartizlik suylan. Hristos lääzımdı en ilk tamannasın bu zakonu.
Ölä söleer ayoz bobalar, neçin bu iş oldu: geçirdiynän aklımızdan, açan Allah yıkadı bütün dünneyi suylan, açan buuldu hepsicii da kalmadı bişey, ozaman Allah o buultmaklan yıkadı topraa günahtan, hepsicii kaybeldi, sade kaldı Noy aylesinnän.
Bırada Hristos, açan giryer suya – buuldyer günahı, evelki Adamı. Evelki Adam, angısı vardı ilk insannardan hem angısı yaptı günahı. Te nerada Hristoz buuldyer onu bu suda da artık çıkȇr o sudan eni Adam. Bizim da vaartizliimiz ikär ölä. Açan biz vaartiz olyerız suda, vaartizliktä biz hepsimiz ölyeriz günaha da artık duȇȇrız enidän Hristoza, daymalı ömürä deyni.
Neçin deyni dooru yaşamaa deyni, lääzım brakalım eski yaşamamızı: şiniyadak yaşadım günahker, şini bän brakȇrım günahker yaşamamı da ötä dooru artık savaşyerım yaşamaa dooru yaşamaklan. Hristos çıktıynan sudan, Kendi veryer eni yaşamak hepsiciinä hem eni Adama. Eski Adam buulyer, çıkȇr eni Adam, insana Allah getiryer eni yaşamak. Diil yaşamak, angısı dolu günah astalıınnan, ani vardı şiniyadak, ama yaşamak, angısı var kurtuluş yaşaması.
Böönkü gündä yortu, angısını biz bakȇrız, var bizä deyni Allahın kurtuluş bereketı, angısını Allah getirdi böönkü gündä. Böön onun için da biz hepsimiz toplanyerız, dua ederiz, şükük ederiz, getiryeriz aklımıza, nelär oldu hem ne yapıldı bizim için insannar için.
Allah versin da eni yaşamak enidän astalanmasın! O bizdän baalı, nicä biz onu götüreciz hem kullanacız. Açan ayazma bırada okunyer, var ölä lavlar: “Geçirsin bu ayazma bizi daymalı ömürä“. Burada sölenilyer vaartizlik için. Bu dualar, angısınnar okunyer bu büük ayazmada, okunyerlar vaartizliktä da, açan sıra gelyer vaartiz etmää uşaa yada büük insanı. Da burada sölenilyer, ani bu ayazma getirsin bizi daymalı ömürä. Amin.
Nicä ayazmayı kullanmaa? Dünkü, böönkü ayazma — onnar birtürlü. Böönkü gündä var nicä içsin hepsicii, kim idi hem imedi.
Ne diil lääzım yapmaa? Diil lääzım yapmaa günah, o herkerä. Kullanmaa herkerä iilä deyni ayazmayı var nicä hem lääzım da.
Prot. Feodor Karakalçev
