Bakarak genä ayozların yaşamasına, var, ne görmää, var, ne almaa örnek. Bizdä böön çok seret olyer, ani biz söleriz hem da isteeriz ölä olmaa, ani yaşamaa, nicä hepsicii yaşȇȇr. İsteeriz, ani uşaklarımız olsun, nicä hepsiciin uşakları, taa prost olmasınnar, başkasından alt kalmasınnar, onnar da olsun hepsi uşaklar gibi. Söleeriz da, ani büük çirkin işlär yapmȇrım, yaşȇȇrım, nicä hepsi yaşȇȇr. Ama lääzım bilelim bir iş – biz diil lääzım yaşayalım, nicä hepsicii yaşȇȇrlar, biz lääzım yaşayalım, nicä hristiannar. Açan biz böön vartiz olduk, açan biz ayırdık böön Hristozu – biz lääzım yaşayalım, nicä hristian, neçin deyni biz adadık kendimizi, ani biz yaşayaciz Hristoza. Açan biz yaşamayacez Hristoza, bizä diil lääzımdı Vartizlik. Neçin deyni, nicä hepsi yaşȇȇr, ölä yaşȇȇr yabancı inanda insannar, ani birda zor çekmemäk, aaramaa kendimizä raatlık. Hepsindän paalı — bizdä olsun imä, içmää, olsun paramız, olsun hepsi yakışıklı işlär evlerdä hem onnarın arasinda bän nekadar sa arada-arada gelecäm klisää yada dua edecäm Allaha, isteyecäm Allahtan yardım, açan benim olacek zorum. Ölä yok nicä yaşasın hristian, hristian lääzım yaşasın, nicä hristian. Açan bän isteerim benim uşaklarım olsunnar, nicä hepsicii uşaklar, ozaman o ölä da olacek, sıra gelecek görmää kendi uşaklarımı zararlarda hem da büük kahır onnar bana getireceklär, neçin deyni böön üüredyer uşakları taa çok İnternet, taa çok mındarlık, ne var dolayda. Açan bän kendi uşaamı savaşmȇrım üüretmää, bän onu savaşmȇrım terbi etmää, ozaman onu üüredyer sokak, onu üüredyer herbir mındarlık. Onnar kendileri hepsicii yapışyerlar da onnar büüdyerlar. Açan bän isteerim olsun benim uşaam nicä hepsicii — te ölä da olacek.
Bakın, nekadar Ayoz Panteliymon bizä örnek gösterer, o kasabada hepsicii yaşardı, nicä hepsi yaşȇȇr. Orada vardı pek çok insan, açan 20 bin kişiyi hristian yakmışlar orada, çıkȇr, ani o büüktü bir kasaba. Bu kasabada yaşaardı popaz, angısı vartiz etti Panteleimonu, vardı Panteleimonun anası, ani vardı hristian, Panteleimon, angısı sora olyer hristian. Vardı insannar, angısınnar yaşamardılar, nicä hepsicii, ama yaşardılar, nicä hristian. O arada olmaa hristian, vardı pek zor, ama onnar ayırdılar kendinä Hristozu, ani yaşamaa Hristoza yakışıklı.
Hristos ölä lafları söleer: “Ne sizä baaşış, açan siz yapacıınız yaardım onnara, kim sizä yardım yapȇr. Ne fayda sizä, açan siz vereciiniz ödünç onnara, kimdän umutedersiniz, ani gelecek geeri sizä. Ama siz yapın iilik onnara, kim sizä fenalık yapȇr. Prost edin onnarı, kim sizi neylän sa gücendirer. Da ozaman sizä baaşış olacek.” Hristoz ona deyni vardı örnek. O vermedi, O yapmadı, gelmedi iilik yapmaa onnara, kim Onu saydı. Erdä, nekadar vardı insan, onnarın arasında sayılı onnar, kim Ona inandı. Kaç kişi da Onu aaradılar öldürmää, zeetlemää, ölümä vermää? Kaç kişi onnar? Taa zeedesi. Ama O geldi da yaptı iilik. Hepsiciinä Hristozun bitki laflarıydı: “Afet, Boba, neçin onnar bilmerlär, ne yapȇrlar.” Açan Ayoz Petri söleer: “Saabi, ya biz onnara, kim yaptı zarar Sana, şini nesaydı biz yapalım.” O onnara deer: “Ne sän sanyersın, ani Bän yok nicä şin yalvarayım Bobama, ani yollasın bir bölük asker burayı, Angelleri, angısınnar yakaceklar, yokedeciklär hepsiciini? Ama Bän onun için gelmedim erä. Bän gelmedim onnarı yoketmää, Bän gelmedim onnarı yakmaa, Bän gelmedim onnarı kaybetmää. Bän geldim onnarı kurtarmaa.” Ölä vardı izmeti Hristozun.
Açan biz böön hristian, ölä lääzım olsun bizim izmetimiz — taşımaa Hristozun adını. Ozaman da nesaydı olyer dünnedä, nesaydı diişiler. Açan sa nicä hepsi yaşȇrız, nicä hepsicii cendemä da gideciz. Ölä da olacek. Onun için, bizä herkerä, her gün, açan açȇrız böön kalendari da göreriz orada ayozları, okuyerız onnarın yaşamasını, herkerä bizim fikirimizä lääzım geçsinnär, nicä vardı ayozlar, nicä onnar yaşardılar, nicä onnar dayandılar, böönkü gündä etiştilär o uura, ani biz hepsimiz onnara dua ederiz. Biz böön onnarı anȇrız da isteeriz onnardan yardım. Tez yardımcı hem da duacı bizim cannarımız için. Amin.
Prot. Feodor Karakalçev
