Bobanın, Oolun hem Ayoz Duhun adına!
Sevgili kardaşlar hem kızkardaşlar!
Böönkü gündä, bu yortuda var nicä annatmaa kurban için. Kurban o ne biz yapȇrız bütün yaşamamızda, nesaydı kendimizdän böleriz da yapȇrız kimäsa onnan bir iilik. Ona denyer kurban. Baktıynan böönkü yortunun adını, bizim Allahımızın anasına, Panayiya, göryeriz, nekadar onda vardı kurban, ani O yaptı hem da böönnen-böön yapȇr insannara deyni.
Bizä deyni bizim kurbanımız ne?
Bizim kurbanımız – o bizim yaşamamız, neyä biz lääzım dayanalım. Ne Allah bizä böön verer, ona biz dayanyarsaydık, o da var bizim kurbanımız.
Ne kurbanı isteer Allah bizdän?
Nesaydı verelim kendi vaarlıımızdan — ona yok nicä demää kurban, neçin deyni Allah bizä onnarı verer, da biz verärsaydık, biz vereriz gene Allahın işindän: Allahın payından biz çevireriz Allaha. Ona yok nicä demää kurban. Başka nesaydı demää, ani biz yapȇrız? — biz böön bişey yapmȇȇrız.
Allah isteer bizdän bir kurban – “brakıl kendi gunahlarından. Getir Bana günahlarını, getir Bana zeetlerini, angısınnar seni zeetlerlär. Te onnar, ne yapȇr sana fenalık, te o zeetleri getir Bana”. Sade brakıl onnardan, ani biz bölelim kendimizdän diil vaarlıımızı, ama bölelim kendimizdän t günahları, bölelim kendimizdän fenalıkları, hepsi zeetleri, nelär böön bizdä var. Sade onnarı Allah isteer, ani biz onnardan brakılalım. Bunnardan biz brakılmasaydık, ne bizdä var? Bizdä var haylazlık, fenalık, maana bulmak, kimisaydı kötülemäk, çok görmäk. Te onnar bizdä var, angısınnar böön bizi zeetlerlär. Hepsi onnar bizi zeetlerlär. Da Allah isteer bizdän diil, ani getirelim kuzu yada para, ama getirelim günahlarımızı. Da olsun bizä raat, olsun bırda da ii yaşamak, ani bulunalım ayozların arasında, angısınnarı Allah böön artık toplȇȇr Kendi sürüsünä. Bizim kurbanımız var sade okadar, ani dayanlım, olmaylım haylaz, üşenmeylim. Da Allah te bunnarı kabledyer. Onuştan, Panayiyanın böön var Örtüsü, angısınnan o bizi böön hepsimizi örteer. Yortu, angısı var bitkisiz. Var nicä demää, ani, elbetki, biz böön anȇȇrız da, yaşȇȇrız da böön te o yortularlan, angısınnar bizim için yapıldı: Hristos duudu bizim için, Hristos vaartiz oldu bizim için, Hristoz Gökä çıktı bizim için, Hristos dirildi bizim için. Hepsi yortular var bizim için, ama bu yortu, angısına deeriz Panayiyanın Örtüsü, var bitkisiz. Panayiya, Ana gibi, her kerä saklȇȇr, her kerä koruyȇr herbir fenalıktan, herbir kahırdan, herbir zordan, herbir iştän, ne bizä var nicä yapsın fenalık.
Panayiya örter bizi bitkisiz.
Amin.
Prot. Feodor Karakalçev
