Hristos yaptı hepsiciini, tamannadı, o dirildi ölülerdän, insanı kurtardı daymalı ölümdän, daymalı zeetlerdän kurtardı insannarı. Dirildi ölülerdän, üsteledi, ensedi ölümü.
Ama neçin sa o taa çıkȇr hep Gökä?
Bizä deyni verildi hepsicii, ama lääzım olsun bir iş, ani ne bizi ayozlayacek.
İnsan kaybetti Allahın vergilerini, açan yaptı günaa. Şindi lääzım gelsin Ayoz Duh, angısı verecek te o baaşışlarını, angısınnardan aşırı her bir can diriler, her bir can yaşȇȇr nedän aşırı, biz onnarı büün işideriz, da herkeret, ani «Святым Духом всякая душа оживится”, ani “Ayoz Duhlan her bir can yaşȇȇr». Ani bizä deyni tamannandı, Hristos getirdi, nicä demää o ilacı, angısı bizi kurtarȇr.
O iş için da Hristos gezer taa 40 günädan, bulunȇr erdä, açan artık diriler ölülerdän sorana. Da nicä söleer bizä Ayoz Yazı: 40 günädak O üüretti üürenicilerini Gökteki Padişaahlık için, onnar bizä kalȇrlar apostollardan: nicä lääzım olsun liturgiya, nicä lääzım olsun vartizlik, stevnozluk, nelär lääzım olsunnar. Da geler te vakıt, ani kırkıncı gün O çaarȇr üürenicilerini, gider onnarnan bayıra, ona deniler “Масличная гора”, bayır Eleon. Orayı çıkȇr, da orada onnarı iisözleer, da iisözleräk, çıkȇr Gökä da söleer: “ Bän sizinnän varım dünnä bitkisinädak.”
Apostol Evangelist Matfey bizä söleer, ani «Gidin da üüredin, nasaat edin hepsiciinä insannara, üürederäk onnarı” Bobanın, Oolun hem Ayoz Duhun adına hem “te bän vaarım sizinnän bilä Dünnä bitkisinädak”. Biz annȇȇrız, ani Hristoz çıkȇr Gökä, ama o nesaydı bizä brakȇr.
Ne bizä brakȇr Hristos, çıkarkana Gökä? — O brakȇr Kendi-Kendini. Biz böön bulunȇrız klisedä, nerada var Hristos. Biz böön alȇrız komka, ani var Hristozun güüdesi hem kanı.
Hristos bizdän ayırılmȇȇr…
Prot. Feodor Karakalçev
