Paskelledän Troiţayadak var elli gün. Bizdä böönkü günda yarılınyer te o günnär. Da böönkü Evangeliyada biz işittik, ani çıvıtlarda var bir yortu (Праздник кущей).
Nedän kalyer o?
Kalyer te ondan, açan yaban erdä, çıktıynan egipedin çıraklıından, çıvıtlara Allah yollȇȇr ekmek göktän (манна небесная), veryer ölä, ani Moisey taşa urduynan çekedyer akmaa su. Doyuryer da, sulȇȇr da insannarı, angısınnar vardı Allahın ayırılmış insannari.
Da bu adet kalyer, ani çıvıtlar bakȇr bu yortuyu her yıl, orada ölä olyarmış: bayirin yaninda varmış bir izvur da oradan popaz alyardı su klisenin altın kabınnan da getiryardı da dökärdi suyu kurban sofrasına, anmak için ani Allah çıkardı onnarı çıraklıktan.
Burada da, açan Hristos çıkȇr nasaat etmää bu yortuda, da ölä üüredyarkana soleer: “Kim susamış, gelsin Bana da içsin”. Hristos söleer, ani o Su, angısı var her kerä, akȇr Klisedän, su angısı var bizä deyni Allahın güüdesi, Allahın kanı. Da te bu sebeptän, bizdä olyer, ani böönkü günda okunyer ayazma, bundan kalyer bu adet.
Allahın böön vergisi – te bu su, angısı akȇr her kerä klisedän, o var bizä deyni diyil sade yılda bir kerä, ama var her bir vakıt. Her bir vakıt biz onu kullanyerız, var nicä kullanalım, ama sade inannan kullanyarsak, kabledyeriz büük fayda en ilk canimiza ilaç, sorana da güüdemizä deyni ilaç.
Hem böönkü gündä da bizim Ayoz Klisä anȇr bir ayozu, ani var ayoz Nikul Nışanyaradıcı. Böönkü günda anılyer, açan diyştiryerlar onun güüdesini. Ayozun güüdesi bulunyardı bir kasabada Mir Likiyada. Sıra gelyer 700 yildan sora orayı gelyerlär yabancı inandan insannar, angısınnar mındarlarmışlar kliseleri. Da Nikolay istämeer güüdesinnän kalmaa orada, ama isteer, ani onun güüdesini diyştirsinnar başka erä, nerada var haliz hristiannar. Da ozaman onun güüdesini var nicä demää kapȇrlar oradan, neçin deyni kalaydı orada onu mındarlayaçıydılar, da geçiryerlar İtaliyanın bir kasabasına — Bari. Taa getirdiynan orayı, pek çok insannnar alışyerlar kendi astalıklarından. O günä da düşer atili bir gün “Святые отцы первого вселенского собора”. İkär o topluşta da bulunyardı ayoz Nikul Nışanyaradıcı, o vardı pek bir açık koruyucusu, bizim ayoz dooru saltanatlı dinin koruycusu. Korkusuz açik inan eder hem kim kötülärmiş bizim inanı, kim kötüler Hristozu, kim saymȇr Hristozu Allah erinä, onnara deyni o hepsinä karşı koyer. Bitki-bitkiyadak bileriz hem da Ariyayı, ani var yalancı üüredici. Ayoz Nikul uryer bir şamar, dayanamȇr, okadar ona güç gelyer, ani o böölä kötüler Hristozu.
İkär te o günä da o yılın düşmüş, neçin deyni biz bileriz, ani Paskellä gezer, te bu aftalar da gezer. Onuştan o yılın, açan onun güüdesini geçiryerlar 11 üzyıldä Mir Likiyadan Bariya düşer Pazar gününä, nereda anılyer Ayoz bobaların ilk büük topluşu.
Onuştan ayozlar var hepsicii örnek, neçin deyni yaşamasını da baktıynan, her bir işini baktıynan, ayoz Nikul Nışanyaradıcı okadar sevärdi Allahı, okadar çalışyardı, okadar koruyardı dooru inan, ani Allah ona verdi bölä, anı onun geçilmesindän sora böönnän-böön anılyer hem biz hepsimiz gelyeriz kendi zoorlarımızda, herkerä isteeriz: “ Ayoz Nikul, dua et Allaha bizim için”. Amin.
Prot. Feodor Karakalçev
