Bobanın, Oolun hem Ayoz Duhun adına.
Sevgili kardaşlar hem kızkardaşlar, böönkü gündä bizim Ayoz klise anêêr Ayozları, angısınnar çok izmetettilär, ani biz onnara deyeriz bütün Dünneyin Üüredicileri. Onnar kurdular duaları, liturgıyaları, ani olêrlar klisedä. Bundan da kaarı onnar çok izmetettilär, onnarın var çok yazıları: Büük Vasiliy yazdı çok kiyat, Grigoriy Allahsözlü, ani vardı onun dostu, onnar bilä üürenärdilär hem çok izmetettilär. Altınazlı İoannın var pek çok kiyatları, angısınnarda açıklêêr bizä Evangeliyayı, ani bizä taa kolay olsun annamaa Ayoz Yazıyı.
Neya var nicä şaşmaa? Var nicä şaşmaa te ona, ani onnar hepsicii vardılar arhierey, onnar hepsicii vardılar episkop. Onnar bulyardılar vakıt yazmaa te o kiyatları. Biz böön bulamêrız vakıt okumaa onnarın kıyatlarını, angısı bizä lääzım olsun utanmak, neçin deyni yazmaa hem da okumaa kiyatları o var pek büük ayırı iş. Bizä deyni bulmaa vakıt okumaa deyni, lääzım üşenmemää, biz ölä da bulêrız böön boşuna vakıdı geçirmää: bulêrız vakıt televizoru bakmaa yada başka işlärä. Onnarın erinä biz yer birärazçık her gün okuyaydık, baalem dört-beş sayfa, olacıydı faydası. Ama bizdä olêr, ani diimeriz ellerimizlän kiyatlara da, nerada sa durêrlar bizdä.
Bizim Ayoz klise anêr bu Ayozları hepsicini birär-birär, onnarın var günneri. Ama böönkü gündä onnar anılyer üçü. Neçin? Bu Ayozlar gelerlär arhiereyin düşünä da söleerlar: «Bizi diyl lääzım ayırmaa, bizim aramızda yok büük, küçük, biz hepsimiz var bir Allahın önündä, hepsimizin bizim izmetimiz böön kablediler, neçin deyni biz bulunêrız Allahın klisesindä». Onuştan yok nicä onnarı ayırmaa da saymaa kim sa taa büük, ya da kim sa taa küçük.
Biz böön varkana hristian bizim işlerimiz lääzım göstersin, ani biz varız hristian, ani biz varız Allahın uşakları, ani biz varız Allahın izmetçileri. Biz böön ne yapêrız onnar her bir işimizi lääzım göstersin, bizä bakarak lääzım okusunnar Evangeliyayı.
Üüredicilerä deyini diyldi paalı ne uurda bulunêrlar, onnar böön hepsici var arhierey, ama hepsici ölüm da kablettilär, onnarı kooladılar da. Altınazlı İoann ölüm çeker Kavkazda, bitki lafları onun vardı «Şükür Allaha her bir iş için».
Ölä o Ayozların vardı yaşaması, onnar zeet ta çektilär, varkana büük, sıra geldi alçaklandılar.
Baktıynan bizä, her biz işlediysak neradasa büük erdä, nerada bizi sayardılar da sora işlemää bir küçük iştä bekleycı mı, paklaycı mı, başka mı bir iş, o bizä geler, ani bizä gülerlär, ani «bän böölä erdä yok nicä işleyim». Ona deyni var bir örnek askerlerin başı — Suvorov A.V., angısında vardı büük çin generalissumus. Suvorov, nerada cenk etti, hepsini üsteledi, o yok tarattı bir da cenk, ama sıra geldi, ani o çıkınsin geeri ani kendi braksın kendi izmetini, ozaman da o gücenmeer, gider kliseyä da olyer klirozda okuycu. Bıkadar o büüktü da indi aşaa, ona deyni o diyl gülmäk. Biz sa böön hepsimiz saveşyerız olmaa kuvettä, biri-birini üstelemää, biri-birini çiinemää. Ama bizä deyni var örnek hepsici Ayozlar: onnarın yaşaması, onnarın nasaat etmesi, onnarın zeetleri, onnarın kan dökmesi. Hepsi onnar bizä gelyerlar te ona deyni, ani biz, göreräk onnarın yaşamasını, meteneylim Gökteki Bobamızı. Amin.
Protoierei Feodor Karakalçev
