Bobanın, Oolun hem Ayoz Duhun adına.
Sevgili kardaşlar hem kızkardaşlar!
Böönkü gün var Hristozun karşı gelmesi Simeonnan — doorulu bir adam hem da dooru inanlı, ii inanlı adammış. Açan padişaahlık edärdi urum padişahı, vardı bir padişaah Ptolomey Filadelf, angısında vardı pek büük biblioteka, vardı pek çok kiyat, sade yoktu bir kiyat – Bibliya. Neçin deyni Bibliya yazılıydı çıvıtların dilindä; da o isteer, ani onun bibilıotekasında olsun te o kiyat, angısına deniyer Bibliya. O isteer, ani çıvıtlar çevirsinnär onu urum dilinä. Ayıryerlar 70 kişi, angısınnar çevireceklär çıvıt dilindän urum dilinä bu Ayoz Yazıyı. Onnarın arasında da varmış Doorulu Simeon, alizdän onnar 72 kişiymiş, ama denilyer onnara ani 70, da onnara hepsicinä payederlär te o Ayoz Yazıyı, Angısını onnar lääzım çevirsin urum dilinä.
Simeona düşer çevirmää prorok İsayayın nasaat etmesi. Da o etişyer te o erä, nerada sölenyer, ani «Kızdan duacek Çocuk», urum dilindä o yazılyer «Kız, Angısı evlenmemiş», da o şaşêr: «Nasıl kız var nicä duudursun uşak?» Ozaman o isteer kesmää ya da kazımaa te o eri, nerada yazılıymış «Kız duuduracek», isteer doorutmaa, ani Karı duuduracek. Açan o sayıkler bu işleri da alyer bıçaa kesmää deyni, onun içerindä olyer bir şafk, gelyer Angel da deer: «Neçin sän isteersin bozmaa Yazıyı? Neçin sän isteersin diiştirmää bu Yazıyı? Sän inanmêrsın, ani Kız duuduracek mı? Açan Yazıda yazılı böölä, ölä da lääzım olsun.» Ozaman deyer Simeona: «Sän kabletmeyecän ölüm almadaan elinä te o Uşaa». Geçer çok yıl, Simeonun soyları hepsici geçilyer, neçin deyni geçmiş üçüz yıl, da o yaşêr te onnan, ani kabletmeycek ölüm karşı gelmedän Kurtarıcıynan, almadaan ellerinä Saabiyi İisus Hristozu.
Simeona Allahtan açılyer, nezaman duacek Hristos, nicä adetlerä görä lääzım olsun, ani getirsinnär Onu kliseyä, da orada o bulunyer da bekleer nezaman getireceklär te o Evladı orayı kliseyä. İosiflan Panayıya gelyerlar kliseya da getiryerlar orayı Hristozu. Orada onnarı karşlêêr Doorulu Simeon.
Onnan bulunyarmış orada bir karı, adınnan Anna, angısı 80 yaşında olmuş, angısı evlener da sade 7 yıl yaşêêr kocasınnan, sora kocası geçilyer da açan kalyer dul, vakıt gelyer da kalyer klisedä da izmet eder kendi yaşamasınnan Allaha. Da göördüynän, ani Hristozu getirdilär, Simeon alyer Onu kucaana da deer: «Şini, böönkü gündä Sän beni salverersin Zaapçi, neçin deyni gördü benim gözlerim Senin kurtuluşunu, ani Sän azırladın Senin insannarın önündä».
Böönkü Apostolda da biz işittik, ani her kerä küçük kableder iisözlemäk büüktän, deyeciz ki, bobası iisözleyer uşaanı. Bırada da olyer ölä: sayılyer, ani Hristos – Uşacık, küçük Evlat, Simeon sa üçüz yaşında. Ama haliz Hristos tuter Simeonu elindä, neçin deyni O var Allah, Angısı tuter bütün dünneyi Kendi elindä, diyl ani Simeon iisözlesin, ama Hristos iisözleer Simeonu..
Da ozaman onun var nasaadı, ani söleer Panayıyaya: «Bu Evlat var çoyun düşmesinä hem çoyun kalkmasına». Ne o sölenyer? Düşmesinä – kim inanmêr, kabletmeer Hristozu, onnara var düşmää deyni, ama kim Onu kableder, inanyer Ona – onnara O var kalkmaa deyni.
«Senin da üreendän geçecek kılıç». Ölä da olyer, biz bilyeriz, ani Panayıya sıra geldi görmää hepsi zeetleri, var nicä demää duumasından beeri Hristozu aaradılar öldürmää.
«Karşı gelmäk», ani Simeon üçüz yıl beklemiş Hristozlan karşı gelmää. Üçüz yıl kabletmemiş ölüm, ona zoordu: böön biz bileriz, ani zoor, açan sän ihtärsın, zoor sana, açan sän astaysın, zoor, açan senin kalmamış bir da soyun, dostun kalmamış; bileriz, ani o ölüm da kabletmeyecek, bekleer üçüz yıladak karşı gelmää Hristozlan, da o kableder Onu sevinmäklen. Bizä deyni Allah her kerä verer kendi iiliklerini, aarêêr karşı gelmää deyni, biz kabletmeriz Onu yada aylanyerız, yada kablettiynän, ne bizä lääzım ondan, sora brakêrız, unudyerız Allahı.
«Karşı gelmäk» olyer her bir insanda, gelyeriz mi kliseyä, inanyerız mı, inanmêrız mı, o her kerä olyer, ama sora lääzımnı «Karşı gelmesini Allahın» kaybetmemää. Olmasın, ani karşı geldik da sora kaybettik Allahı da bundan sora sıra gelyer, ani buluşyerız, açan geçilmişik bu dünnedän da ozaman karşı gelyeriz Allahlan.
Allah aararkana bizimnän te o karşı gelmeyi, biz da lääzım gidelim ona karşı. Karşı da geldiynän, savaşmaa Onu kaybetmemää. Amin.
Protoierey Feodor Karakalçev
