Bobanın, Oolun hem Ayoz Duhun adına!
Sevgili kardaşlar hem kızkardaşlar, Hristos tamannêêr hepsicini Moisein zakonuna görä. Biz göreriz, ani bir çizgi da, ani vardı Moisein zakonunda, O bir işi da geçmedi, ani saymasın, ani atılsın O Moisein zakonundan. Ama büünkü gün var Dozdolay kesilmesi: her bir çocuk sekizinci günü lääzım getirilsin kliseyä da dozdolay kesilsin. Bunnan onun var adanması Allaha, ani adanyer Allaha, nicä büünkü gün bizdä var Vartizlik, ani Vartizliktä biz atılyerız şeytandan, atılyerız günahtan da adêêrız: “Ötä doru biz izmet edeciz Allaha”. Da Hristos onu da tamannadı, ikär Ona hiç diyl lääzımdı o zakon, ama onnarı hepsicini tamannêêr hem alêêr bizim kurtulmamız için. O indi erä göstermää, ani Kendi tamannêêr bütün zakonu hem ani biz o zakonu savaşalım tamannamaa: ani bişey Ondan geçmedi, bişeydän atılmadı.
Ne o sayılêr doz dolay kesilmesi? Büünkü gündä, baktıynan biz keseriz kendimizdän günahları, atılyêrız günahlardan da adêêrız, ani ötää doru izmet edeciz Allaha. Çekettiynen Hristozdan, Ani savaştı tamannamaa, göstermää Kendini erdekiycesinä, ani geldi kabletti güüdä, ani duudu Panaiyadan da bunnan gösterdi, ani O var Allahın. Göreriz, ani hepsici Ayozlar, angısınnar vardılar dünnedä, sayerlar Allahı hem da bitkiyadak atılmadılar Allahtan, onnar onu gösterdilär kendi kan dökmesinnän, kendi zeetlerinnän, verdilär kendi canını, döktülär kendi kanını, ani onnar atılmêrlar Allahtan, ani onnar var Allahın izmetkeleri. Saymardılar bişeyä kendi yaşamasını, saymardılar bişeyä kendi saalını, saymardılar bişeyä kendi vaarlını, açan kalyardı soruş: “Sän Allahınsın mı o sa sän yalancı allahların, yada dübüdüz atılyêrsın Allahtan?” Onnara diyldi bişey paalı Allahtan, Hristozdan karı, da onnar ayıryardılar taa ileri Allahı, nekadar kendi varlıını, kendi saalını, kendi yaşamalarını.
Biz sa büün sayerız Allahı taa çok sofraylan, konuşkaylan, içmäklen, imäklen. Bizim yortularımız taa çok biter te onnan, ani biz büün sayerız, ani toplandık bir sofrada. Var nicä olsun, ani kliseyä gelmeeriz, te şini yaklaşêrız vakıt İvan gününä, bütün küü bakêr o günü. Kaç İvan geler kliseyä? Var nicä demää: bekim da üzüncü payı taa geler, elbetki hepsi için duaederiz, isteeriz hepsin için, ani anêrız onnarı klisedä, onnardan pek az kişi kim geler. Ama hepsimiz o günä hazırlanêrız, gideriz panerä, alêrız imeklär, hazırlêêrız hepsini..
Büünkü gün Klise anêr ayozu — Üüsek Vasilii. Beki da o kan dökmedi, ona sıra gelmedi kan dökmää Hristoz için, ama o genä aldanmadı, bakmadı kendi varlıına yada ani onu kapıycıklar zındana mı, yada yabanı erä yollayaceklar, yada zeetleyiciklär onu. Ona diildi korkunç nesa kaybetmää, o deer: “Her alyarsınız benim varlıımı, onnan beni korkutmayacenız, bendä var birkaç kiyat, angılarını bän okuyerım. Her korkudyarsınız beni, ani kapıycınız yada yollaycınız yabanı erä — bütün toprak var Allahın topraa. Korkudyarsınız, ani beni düveciniz hem öldüreceniz — bän onnan taa tez yaklaşadcam benim Allahıma Hristoza, Angısına bän bütün yaşamamda savaşêrım, ani olmaa Onunnan bilä, Onun yanında”. Te onu bişeylän korkudamadılar. Burada da var bitkiyadak inan Allaha. Bekim sıra gelmedi kan dökmää, ama atılmamaa Allahtan, ani kayıl olmaa vermää hepsicini, ölümü da kabletmää, kayıl olmaa vermää varlıını da sade olmaa bir Allahlan – O var hepsindän paalı. Te o bizdä da büün saymak Allahı yada Ayozu – o diyl saymak sade konuşyarkana, sofrada da sölärkana “Saalık Allah versin da olsun hepsici te bunnar, te bunnar, hepsici tamannansın”, o gün bunnan da biter. Biz çok serä üşeneriz gelmää kliseyä, durmaa biraz da dua etmää, demää: Allahım şükür Sana! Şükür edeyim, bän başka bişey tamannamêrım, balim şükür edim Sana her bir işlär için, ne Sän bana verersin, koruyersın, aylemdä var bir parça imää, yardımcı olêrsın kazanmaa, ani gelmää da şükür etmää Allaha — te onnar bizdä çok kerä olmêr. Ayozlar, angıları sayerlar Allahı, ani var Allahın izmetkeri, gösterärdilär te onnan, ani kan dökärdilär, gerärdilär canını.
Her kerä her bir Ayoz var bizä deyni örnek — onnnar bizä boşuna verilmerlär. Her biz taşıyarsak kimin sa adını, biz onu taşımêrız boşuna. Bizä onnar verilerlär örnek için, ani biz onnardan alalım örnek kendi yaşamamıza deyni. Bakalım, nicä onnar yaşardılar, bekim vakıtlar diişildi. Büünkü gündä bekim vakıt dişildi, ama Ayoza benzemää deyni vakıtlar dişilmedi. Nicä apostol Pavel söledi: “Neylän bän var nicä üüneyim, var nicä üüneyim sade Hristozun stavrozunnan, Angısınnan dünnä gerildi, bana deyni hem da bän dünneyä deyni gerildim” — bunnan hepsici tamannanêr bana artık kalanı işlär diyl lääzımnı. Sade kaybetmeyim Allahı.
Te ölä bizä deyni da var örnek hepsicii. Açan Hristos tamannadı hepsicini, kayıl oldu en çirkin işlerä, en çirkin zeetlerä, en çirkin ölümä kayıl oldu, ani yapmaa, tamannamaa hepsicini, ani kabletti dozdolay kesilmesi, kabletti zeetleri, sıra geldi duudu Panayıyadan, tennendi, güüdä kabletti Panayıyadan, bizim için bayırda Favor suratı dişildi, çıktı gökä — da her kerä işideriz: “… bizim için hem bizim kurtuluşumuz için” Allah yaptı bunnarı hepsini.
Bizä deyni kalêr atılmamaa Allahtan, saymaa sade Allahın izinnerini, angısınnnari biz adêȇrız Vartizliktä, deynä sıra gelmeyecek çikmaa Allahın önünä. Amin.
Protoierey Feodor Karakalçev
