Bobanın hem Oolun hem Ayoz Duhun adına!
Sevgili kardaşlar hem kızkardaşlar!
Bizim Ayoz klise brakmer bizä, anı bız unudalım bizim soylarımızı, senselerimizi, angısınnar geçildilär bu dünnedän.
Her kerä habeerler bizä hem getirer aklımıza, ani biz lääzım onnar için dua edelım, getirelim kendi dualarımızı, ondan kaarä, anı taa var, bizim lääzim olsun evdeki duamız her gün. Ondan kaarä var her cümertisi ölümünün günü, nerada lääzım anılsın onnar.
Gerçek her bir Liturgıyada, proskomidiyada, hepsici için çıkarıler paycaz – dirilär için da, ölülär için da. Dua açan getiriler, onnar hepsici gider komkaya, nereda biz isteeriz, ani Allah kendi pek pak Kaninnan hem da Ayozlarin dualarınnan ikasın onnarın günahlarını.
O her kere var hepsindän paalı dua, açan Allah söleer, ani Allahta ölü yok: “Bän var Allah Avraamın, İsaan hem İakovun – anı Allahın”.
Açan da Hristos geler da bizi artık kaldırdı, artık yaptı ölümü boşuna bir iş gibi, anı kendi Dirilmesinnän verer bizä umut daymalı ömür, ani hepsici kim inanêr, kim kableder, kim vartiz olêr Hristosun adına – onnar hepsici var nicä kabletsinnär daymalı ömür kendinä deyni.
Da bölä bu günnerdä, angısınnarda biz toplaneerız dua etmää bizim geçilmiş soylarımız için, lääzım unutmayalım, anı onnar her kere bekleerlär bizdän dua: neçin deyni insan var nicä diyştirsin yaşamasını yaşarkana hem lääzım diyşelim yaşarkana, zerä öldüktän sora pişmannık yok, öldüktän sora bişey geeri çevirmä yok nicä.
Allah verer herbir insana deyni te o ömürü, te o vakıdı, ani o onu geçirsin yakışıklı Allaha.Yaşamasında nesa da izmet etsin, çalışsın, savaşsın nesa kazansın, anı sıra olduynan Allahın önünä çıkma, utanmaylım bizim işlerimizdän.
Lääzım her bir insan savaşsın yaşarkana nesa yapmaa, neçin deyni çok serä oler ölä, ani insan angısı geçilmiş, isteeriz anı Allah onu kurtarsın, Allah onu alsın Gökteki Padişahlaa.
Her bir iş var nicä diiştirilsin yaşarkana, öldüktän sora diiştirmää bişey yok nicä.
Biz kimär kerä isteeriz kimi sa kurtarmaa, pişman olerız çok işlerdä: «Te nesa da yapalım? Ne var nicä yapalım da kurtaralım? Ne, nicä yapalım?».
Ama neçin sa yaşaarkana, çok serä oler, ani düşünmeriz kendimiz ya da kimsey bizim soylardan, ani onnara lääzım nesa sölemää, dua etmää, ani kendimiz unuderız gelmää klisä, ani kendimiz unuderız oruç tutmaa, komka almaa, doz dolay da kim buluner bekim bizim ev içindä onnara da göstermeriz örnek, nicä lääzım olsun.
Da te geler vakit karşı gelmää ölümün soluunan – suuk solunan. Sadece ozaman vakıt gülmää sıra gelmeyecek, neçin deyni ölüm geldiynen, almaa bizim canımızı, ozaman kimseya olmayacek, ani nesa şaka gelsin aklına, ya da nesa da gülmäk gelsin aklına, taa başka nesa biriciin aklına gelmer. Da te o vakıtta her bir insana sıra geler geçilmää, ozaman biz çekederiz düşünmää soylar için da, ama yaşarkana hiç gelmedi aklımıza da, ani lääzım nesa yapmaa, ani te bu uura etiştiynen olmasın ozaman kaçınmaa nesa sayiklamaa.
Lääzım bütün yaşamamızda yaşayalım birtürlü.
Neçin ayoz bobalar söleerlär: “Tut aklında ölüm vakıdını, da hiç bir da vakıt yapmayacan günah”.
Biz tutmerız bunu aklımızda, biz unuderız hem da bün savaşêrız her kere ölümü itirmää ötää: “Ani böön olmayacek hem sabaa da bän ölmeyecäm! Hem var te nerada işlerim, isteerim kazanmaa, beş-on yılda kazanacam te bunu düzecäm, te bunu kazanacam, te bunu alacam kendimä. Kurerız bizim yaşamamızı çok yıllara, sıra geler, ani dayanmışkana ölüm yaşlardan seksän olmuşuk, beki doksanda hep düşüneriz nesa taa yapacız.
Ölüm her kere geler ansızdan, onuştan ona lääzım olmaa her kere hazır.
Her biz olaydık hazır ölümä, biz hiç günaa yapmayciydik, ama böön biz aterız ölümüzü ötä, da yaperız bün günahlar hem hiç duruklanmerız da onun için da şaşmaa sıra gelmesin, neçin deyni biz onnarı hepsicini yaperız kendi günahlarımıznan, ne var dünnedä onnar oler hepsici bizim günahlarımıza görä.
Onun için da ölüm vakıdı bizä deyni, kim da ani geçilmiş hem kimi artık Allah aldı bu dünnedän, onnar için da her kere klise çaarêr bizi dua edelim. Onuştan onnar için da unutmamaa getirmää kendi dualarımızı, neçin deyni Allahada ölü yok hem Allah hepsicini isteer toplamaa bir ayleya, ani her bir insan olsun onun yanında, insan sa lääzım istesin olmaa, ani atılmamaa, kaçmamaa, çıkınmamaa geeri, yapmamaa kendini, ani işitmeriz, göörmeriz “te bana birici sölämedi”.
Ama bün Allah sesedärkana, Allah istärkana bizä kurtuluş, biz lääzım taa ileri savaşalım, ani Onu aaramaa, etişmää te o uura. Amin!
Protoierey Feodor Karakalçev
