Bobanın hem Oolun hem Ayoz Duhun adına!
Sevgili kardaşlar hem kızkardaşlar, her bir insan angisi ayıryer kendinä Hristozu, bunnan o ayıryer kendinä stavrozu.
Bilyeriz, ani Hristozun stavrozu vardı zeetli ozaman, bizim dä stavrozumuz olacek zeetli, olacek güç. Ayıryerız açan Hristozu, çıker, ani biz ayıryerız onun zeetlerini. O stavrozun bitkisi, o zeetlerin bitkisi var her kerä bereketli, onnarın bitkisi var Gökteki Padişaahlık, neya deyni çalışer hristian bütün yaşamasında hem lääzım çalışmaa.
Da burada da bölä işideriz biz Hristozun laflarını: “Beni kooladıysadılar, sizi da koolayaceklar. Benim lafımı tutuysaydular, sizinda laflarınızı tutaceklar”. Bölä söleer büünkü Evangelıe.
Neçin deyni bakarak ayozların yaşamasına, ama taa ileri baktıynan Hristozun zeetlerinä, nelerdän sıra geldi geçmää Hristoza, ani dünneyä deyni getirmää baarışmaklık (мир), dünneyä deyni getirmää ilaç, ani alıştırmaa bütün dünneyi deyni. Ona sıra geldi geçmää hem çok zeetlerdän. Hem biz bakerız kim vardı onun ayozlarından, onnara hepsıcınä her sıra gelmedıysa dökmää bölä kanını, en aazdan onnara sıra geldi geçmää büük kahırlardan hem büük zoorlardan. Kimi sa beki salt kooladılar nereda sa, kimi sa aaraardılar öldürmää, kim sa geçti çok kösteklerdän, kötüledilär onu, nereda sa gülüntüyä sokmaa savaştılar. Birisinä sıra gelmedi girmää Gökteki Padişaahlaa te ölä, ani döşeliykana altın yoldan ani onnar geçsinnar da girsinnar Gökteki Padişaahlaa bir kahırsız ya da bir zoorsuz. Neçin deyni Hristos ölä da söleer: “Çok kahırlar aşırı bizä sıra gelecek girmää Gökteki Padişaahlaa”.
Te onnara var örnek hepsici ayozlaar hem büünkü ayoz, angısını biz anerız — Dimitriy Solunskiy — angısı duudu uşaksız ayledä, ani onun için dua ettilär bobası, anası. Üürettilär ani o olsun hristian hem bobası da üüretti olsun asker.
Gittiynen cenkä, padişaah sımaarleer ona öldürsün hepsini kim çaarer, kim ani sayer Allahı, kim sayer Hristozu, ani onnara canı acımasın hem öldürsün onnarı. Ama ayoz gider da cenktän geler te onnan, ani taa çok metinner Allahı, ani hepsicinä nasaat eder Allahı. Bunnar için sıra geler ona zeet çekmää, bitkidä da kabletmää ölüm bölä sayerak Hristozu. Her biz sayarsaydik, ani bir kahırsız, bir zoorsuz olacek hepsici kolay, olmer ölä kolay. Her kerä Gökteki Padişaahlaa deyni lääzım büük izmet hem lääzım geçmää çok zeetlerdän. Onuştan da Hristos deer: “Her Beni koladıysıdılar sizi da kolayaceklar. Te Bän gelmäydim da sölämeydim sizä te onnarı, ozaman sizin olmayaceydı kabaartınız, ama hepsini Bän sizä habeerledim, hepsini sööledim, onuştan şindi artık yok sizä dooruluk, ani nesa siz bilmeersiniz”.
Sayarsıdık ani var nicä hem büük para kazanmaa hem olmaa büün hristian kavgasız, ya da sayarsak, ani büün var nicä doyuncek imää hem ne istersin imää hem nereyi ısteersin gitmää dinnenmää, ya da sayarsık ani var nicä kendi uşaklarımızı öldürelim hem bu takım genä hepsici bir kahırsız girmää Gökteki Padişaahlaa – ölä olmer.
Her iş için sıra geler bizä cuvap vermää burada taa, ani yaptıysak biz nesa bir iş, bizä lääzim onnar için nekadar sa zoor çekelim, zeet çekelim.
Açan sa biz yapmışık günah hem istäärsık bir kavgasız o günahlardan bizä af olsun bizä deyni, onnar ölä kolay af olmerlar, buna deyni lääzım pişmannık bütün ürektän, ama onun her kerä her bir günahı geçer zeetlärlän, neçin deyni kendi günah artık var zeet.
Ama Allah salvermer bizä çekelim bütündän te o zeetleri angısınnarı kazandık, ölä baktıynan, biz lääzım dı bir vakıt birdän kaybelelim bu dünnedän da bişey kalmasın bizdäni, neçin deyni bizim günahlarımız büün var pek çok.
Onuştan bizä deyni, ani girmää Gökteki Padişaahlaa her kerä sıra gelecek geçmää zeetlerdän, neçin deyni Hristos dedi:
‘’Her siz Bendän utanacıysaydınız bu dünnedä, Bän da sizdän utanacam açık inan etmää sizi Gökteki Bobanın önündä”.
Burada açan biz utanerız ya da beki üşeneriz, ya da haylazlanerız, Allahın önünä çıktıynan, Hristos da utanacek bizi korumaa bizim te o işlerimizdä, te o günahlarımızda, ani biz yaperız.
Göreriz, ani bu dünnedä diil hepsi ölä kolay hem yok nicä da olsun ölä kolay, ama onnara deyni lääzım olmaa hazır hem her bir işin arasında lääzım kalmaa hristian.
Ne da olsa her bir uurda yok nicä demää, ani yok nicä orada olmaa, te yok nicä oruç tutmaa, te yok nicä dua etmää, te yok nicä klisää gelmää, te yok nicä komka almaa.
Ölä yakışıksız, ölä uymer – yalan onnar hepsici.
Ama oler ölä, ani biz istämeeriz kendimizi zeetlemää, ani bulmaa Allahı.
Her var sa bir küçük köstek, nicä bir pildada ekici için … nerada sa te o taşlı toprakta genä da çıker toom, sürer filiz, ama yokkana onun kökü o pek tez döner da kuruyer’.
Te ölä bizdä da oler, biraz denemäk olduynan: “Ya te yakışmadı, te uymadı, te yok nicä” — halizdän bunnar hepsı diil dooru.
Neçin deyni açan isteeriz olmaa haliz hristian, lääzım her bir uurda bulmaa dooru yol.
Bizä deyni lääzım şükür etmää Allaha ani büün biz ayaktayız hem var nicä gelelim kliseyä her yatalak da olsak lääzım isteelim, ani sürüneräk gelmää klisää, neçin deyne var klisä hem klisedä buluner Hristos, hem buluner her bir ilaç, her bir astalaa deyni.
Sade te onnar için lääzım şükür edelim.
Onuştan aaramaa Hristozu lääzım her kerä. Açan sa aarameerız, açan bulerız bir küçücük maana. Ozaman neramız bizim hristian?
Baktıynan Hristoza diildi kolay, ayozlara baktıynan onnara diildi kolay.
Onnara kolaydı mı geçmää te o zeetlerdän ani açık inan etmää Hristozu, ani kalmaa hristian?
Ama bir neet açan var — girmää Gökteki Padişahlaa, olmaa bizä hristian, kalanı onnar hepsici silinerlär, öbürlär hepsici kolay üstelenerlär, açan sa kalan işleri koyerız ilk uura ozaman Hristos kaler bitkiya hem hristian bunnan kaybeder kendi adını, te onu angısını vartizliktä kabletmiş onnar hepsici bir vakıtta kaybeler.
Neçin deyni biz ona görä da olerız çok serä hristian ilk denemektä.
O için da örnekleri bizä her kerä bizim Ayoz klise gösterer, ani varkana te bölä ayozlar, angısınnar bet zeetlerdän geçtilär, ani onnar bizi kaavilesinnär. Kendi duasınnan hem kendi örnäännen, ani onnara te bölä sıra geldi geçmää, te bölä büük kahırlardan, büük zoorlardan, büük zeetlerdän, ama genä da kaldılar hristian.
Te ölä biz da lääzım geçeräk büünkü denemeklerdän, beki diil okadar zoor nicä onnaraydı, ama her onnara dayanarsaydık, biz kendi adımızı — hristian — artık koruyacız.
Hem Allahın önündä biz sayılacız, ani biz var hristian. Amin.
Protoierey Feodor Karakalçev
