Проповедь в день памяти вмч. Пантелеимона
Bobanın, Oolun hem Ayoz Duhun adına!
Sevgili kardaşlar hem kızkardaşlar!
Böönkü gündä geler aklıma evangelskiy oluşlar, açan Hristoz alıştırȇr on kişiy, angısınnar varmışlar yaralı. Pek siirek o hastalıktan varmış yılaç, ani alışmaa ondan. Da Hristoz alıştırȇr bu insannari. Da onnarın dokuzu gideer ötää dooru şennenmää, sevinmää, bekim dä yapmaa ötää dooru günaa. Sade biri onnarın arasından döner geeri da şükär eder Allaha.
Aldıynan böönkü günü, bilmeerim, bin kişidän bir kişi gelecek mi şükür etmää Allaha, ani alıştı kendi astalıından?
Böönkü gündä bizim ayoz Klise anȇr bir ayozu, Panteleimonu, büük zeetçekeni, angısı var alıştırıcı, ilaççi. Onu anarkana, getireriz aklımıza astalıkları, hem ne için olyer astalık. Hristoz söleer, açan kimisaydı alıştırȇr, git da başka yapma günaa. Böön biz bakȇȇrız, nekadar var hererdä, küülerdä, kasabalarda bolniţa hem da diil bir sade, var pek çok. Dünyada var pek çok bolniţa, angısınnar böönkü gündä dolu asta insannarlan.
Neçin onnar hepsicii olyer? Astalık er bir olmaydı, biz yapaciidık taa çok günaa.
Ayoz Panteleimonun anası vardı hristianka, bobası diildi, ama bobasını da o çevirer, bobasını da getirer Allaha. Sora, açan kableder kendi vartizlik, olyer hristianin, o yapȇr pek çok yardım insannara.
Böönkü gündä dä o var anılma hererdä, herbir klisedä, monastırdä. Onun adına böön var monastırlär da, kliselär da. Allahta ölä var ayozlar, angısınnar böön yapȇrlar yardım hem da alıştırȇrlar bizi. Ötää dooru bizä kalyer sade bir iş – kalyer sade yapmamaa günaa. Savaşȇrız yapmamaa günaa, savaşȇrız yakışıklı Allaha olmaa, bu türlü Allaa alıştırȇr bizi, taa ileri alıştırȇr bizim canımızı. Sora güüdemizi dä. Allaa Kendisi var Ayoz, Allaa Kendisi var İilik, Kendi ayozlarına da verer ölä kuvet, ani bizä deyni onnar en ileri olsun örnek, sora da olsunnar yardımcı bizim cannarımıza. Amin.
Prot. Feodor Karakalçev