Проповедь в день Благовещения
Bobanın, Oolun hem Ayoz Duhun adına!
Sevgili kardaşlar hem kızkardaşlar!
Arhangel Gavriil söleer: “Ayoz Duh inecek Senin üstünä”. Baktıynan, genç 14 yaşında, bunnarı kabletmää haber, Ona deyni vardı şüpä. Göreriz, sölediynän, O okadar geeri söleer, nasıl bu var nicä olsun, neçin benim kocam yok. Sora da, açan söleer Ona arhangel Gavriil, ani bu olacek Ayoz Duhtan, şindi Ona kalyer bir pek önemli seçim: o lääzım kayıl olsun yada kayıl olmasın. Neçin kayıl olmamaa deyni, onda vardı çok sebep: O var nicäydı bitki-bitkiyadan Kendi usluluuna görä sölesin: “Bän diil yakışıklı, ani Bana verilsin bu iş, ani Bendän duusun Kurtarıcı dünnää deyni.”
O vardı nicä bunu kabletmesin. Neçin? Neçin deyni ünündä Onun durȇȇr büük zorlar, büük kahırlar. Biz hepsimiz böön nekadar sa bilyeriz, işittik ya okuduk Hristozun zeetleri için. Biz göreriz Hristozu gerili stavrozda klisenin içindä, bilyeriz, okuduk Bibliyadan, Zakon Bojiydan. Biz göreriz, ani Hristos çekti zeetleri, O gerildi stavroza, bilyeriz Onun zorlarını.
Neleri çeketti çekmää Panayiya? Panayiya çeketti çekmää zeetleri, bu stavrozu taşımaa Kendi üstündä Panayiya çeketti taa ileri, nekadar Hristos. Açan Ona geler arhangel Gavriil demää, ani Sendän duacek Hristos, nasıl denemäk vardı Panayiyanın ünündä. En ilk, O yok nicäydı paylaşsın da bu haberlän, kimäsaydı annatsın. Onu kabletmeyceydilär. Söleyciidilär en ii taraftan: kızçaaz, dangalak sayılyer. En kötü taraftan, Onu düüyeciydilär taşlan, neçin deyni kimin kocası yok, onnarın olsun uşaa, onu kablederlär nicä prost yoldan gezmää. Çıvıtların zakonuna görä, Onu lääzımdılar taşlan düüsünnär, öldürüncä. Ne durȇr Panayiyanın önündä.
Ne ük alyer, ne stavroz alyer Kendi üstünä Panayiya, kayıl olyarkana vermää, getirmää bizä, haberlemää Kurtuluşu! O var nicäydı sölesin: “Bän diilim yakışıklı” Ama söleer okadar lafları: “Се, раба Господня, да будет мне по слову Твоему.” “Bän varım Allahın izmetkeri, ko olsun Bana Senin laflarına görä.”
Panayiya alınmaydı, nicä olaceydı bizim Kurtuluşumuz? Olaciidı mı O bizim Kurtuluşumuz? Panayiya alyer Kendi üstünä bu stavrozu. Onu lääzımdı O kabletsin, taşısın.
Diil kolay karnında aar olmaa, açan senin yok kocan. Birisi Onu istämeer annamaa, bilmeerlär, istämeerlär annamaa, ani Sana Ayoz Duhtan verili bu. Käär kocası da, angısı vardı İosif, diil haliz kocası, ama Ona verildi Onu korusun, Onun kızlıını. O da biraz vakıdadan bişey bilmäzdi. O da düşer şüpää da isteer Onu salvermää, açan üürener, ani utandırmamaa, zarar yapmamaa, vermemää, ani taşlan düüsünnär. Nelär sıra gelyer Panayiya çekmää çeketmedän taa. Sora göreriz, ne zeetlär, ne kahırlar çekti Panayiya te o vakıdadan, açan Hristozu gerdilär stavroza.
Kablettiynän haberi, ani Ondan duacek Hristos, stavrozu aldı Kendi üstünä Panayiya da onu taşıdı. Taşıdı te o vakıdadan, açan Hristos kabletti ölüm stavrozda, dirildi üçüncü günü, te ozamanadan sıra geldi taşımaa Ona te bu ükü Kendi üstündä, bizim Kurtuluşumuzu. Onun için, alizdän da bu yortu bizim Kurtuluşumuzun başı var. Amin.
Prot. Feodor Karakalçev