Отрывок проповеди в день Крещения Господня
Bobanın, Oolun hem Ayoz Duhun adına!
Böön ölä sölener, geldi kurtuluş bereketli hepsiciinä insannara. İnsan, angısı oturardı karannıkta, gördü Büük Şafkı. Büük Şafkı, Angısı var Hristoz…
İoann Vartizedici vartiz edämiş yaban erdä, deredä İordanda. İnsan geler orayı onu seslemää. Ölä dä çekeder Evangeliya apostol-evangelist Marktan, angısı söleer: “Ses, angısı baarȇr yaban erdä”, neçin deyni İoann Vartizedici gider nasaat etmää yaban erdä, getirmää aklına hepsiciinä çıvıtlara unutmasınnar, neredän onnar geldi. Allaa onnarı çıkardı Egipettän, çıraklıktan da yaban erdä onnar gezärdilär. Da orada şini geler onnara Kurtuluş, geler onnara haber, geler Kendi Kurtarıcı Hristoz, getirmää çıvıtların aklına, nicä Allaa çıkardı onnari çiraklıktan, Egipettän. Nicä demää, önemli dikatlık İoann Vartizedicidäydi.
Çıvıtlarda vardı ölä adet, onnara deyni vartizlik sayılardı ikanmak. Çıvıtlar açan yaşardılar yazıçniklerin arasında, neylänsä mındarlanardılar, onnar gelärdilär, ikanardılar. Onnara diil lääzımdı onnarı kimsa ikasın o suda, kendileri girärdilär da ikanardılar, paklanardılar. Bu onnara deyni sayılardı nicä bir vartizlik, kendi günahlarından paklanȇrlar. Demää, ani günahlardan, o diil dooru, neçin deyni günahlardan su paklasın yok nicä kendibaşına. Onu lääzım paklasın Allaa.
Gelärdilär çıvıtlar bakmaa İoann Vartizediciya. Ona yollȇȇrlar kendi üürenicilerini zakonniklär sölemää, neçin sän vartiz edesin. Ama o söleer: “Bän vartiz ederim sizi suylan… Ama benim aardıma geler Kimsaydı, Angısı vartiz edecek sizi Ayoz Duhlan.” Hepsicii, kim orada bulunardı, gelärdilär, vartiz olardılar orada, sayardılar, ani onnar paklanȇrlar. Hepsicii görärdi İoann Vartizediciyi.
Hristoz açan geler Iordana, Onu biricii denämeer. Onu tanıyer sade İoann Vartizedici, neçin deyni o biler, ani O lääzım gelsin, O lääzım vartiz olsun orada. Käär durgudyer onu da deer: “Sän gelersin bendä vartiz olmaa, bän lääzım Sendä vartiz olayım.” Ama Hristoz deer: “Böön biz lääzım tamannayalım herbir dooruluu.”
Allaa girer herkerä usluluklan, ölä Allaa isteer, herbir insan kurtulsun. Ölä Allaa isteer insana iilik sade Kendi sevgiliindän. Kendi sevgiliinnän Allaa savaşȇr bizä getirmää, vermää hepsini. Te o insana, angısı Onu işider. Biz işideriz herkerä Evangeliyada: “Ne mutlu te onnara, kim işider Allahın lafını da koruyer onu.”
Herbir işi, neyi Allaa yapȇr bizim için,dikatlı onu işitmää da koymaa kendi üreemizä. Amin.
Prot. Feodor Karakalçev