Отрывок из пропведи в день праздника Введения в храм Пресвятой Богородицы
…Panayıya bulundu klisedä, da orada Ona geldi aber. Biz böön hepsimiz giryeriz kliseyä, biz gelyeriz bekim her pazarlar, yortudalarda savaşyerız gelmää, oruçlarda savaşyerız gelmää. Ama bizim bulunmamız klisedä olyer taa çok güüdemiznän. Bizim güüdemiz var nicä çıksın da girsin da, neçin deyni biz bu erdän çıkeerız hem giryeriz, ama bizim üüremiz lääzım kalsin bu erdä. Panayıya bulunyardı klisedä, O orada yaşardı.
İerusalim klisesindä vardı, nerada kalsın yaşamaa insan, ölä sölenilyer, ani vardi üç kat 90 içerlän. Aşaakı katta yaşardı dul karılar, angısınar yaşardı adamsız, da onnar koruyardı kendi dulluunu (вдовство). Eer getiryarsak aklımıza, açan Simeon Allahkabledici karşleer Hristozu, onunan bekläärdi Anna da, angısı yedi yıl yaşamış kocasınnan, ölyer kocası da bundan sora o bulunyer izmettä Allaha. Te ölä karılar yaşardılar klisenin içerlerindä. İkinci katta, vardı çıvıtlarda nazoreylar — onnarda sayılyardılar monahlar, onnar evlenmärdilär, traşolmardılar, içmärdilär şarap hem rakı. Onnar te ölä izmettä vardı Allaha. Hem vardı taa üçüncü katı, Panayıya orada yaşaardi, taa çok vakıt okuyardı Ayoz Yazıyı bulunyarkana klisedä. Te o bulunmak klisedä bizdä da hepsimizdä lääzım olsun, ani bütün üreemizdän, neçin deyni biz bu erä giryeriz hem burada bulunyarkana da bizim fikirimiz başka erdä.
Panayıya bulunyer klisedä 12 yıl. Sora lääzım verilsin kimä sa — verilyer İosifa da onda orada yaşeer hem orda da duuduryer Hristozu. Böönkü günda bizim klisä söleer, ani Panayıya giryarkana klisää, aberleer Hristozun duumasını. Bunnan kurulyer aber. Böön klisemiz da çaleer, ani “Hristos dueer, meetinnäyin”, böönkü gündän başleer azırlamaa bizi koladaya, azırleer bizi Hristozun duumasına.
Hristozun duumasını var nicä karşlayalım eer bulunyarsaydık klisedä, ama bulunyarsadık ikär üreklerimizimnän, ozaman Onu karşleerız. Hristos da, Angısı sıydı Panayıyanın üreenä, O sıyer bizim da üreklerimizä, herbir insanın üreenä. Bütün dünyää sıymer Hristoz, dünyä Onu yok nicä sıydırsın, neçin deyni okadar büük Allah, ama bizim hepsimizin üreklerimizä sıyer Hristos, açan biz Ona açerız, kabledyeriz oray Hristozu. Amin.
Prot. Feodor Karakalçev