Bobanın, Oolun hem Ayoz Duhun adına!
Sevgili kardaşlar hem kızkardaşlar!
Böönkü gündä biz anȇrız ayozları, angısınara denilyer “Klisenin Üüredicileri”, onnar var Bütün Dünneyin Üüredicileri (Учителя Вселенские, учителя Церкви). Onnar kendi izmetininän yaptılar Klisää büük baaşış, büük izmet.
Böönnen-böön biz onnara söleeriz, ani Dünneyin hem Klisenin var izmetçileri. Herbirin vardı kendi izmeti. Onnar yaşamardılar, bekim da, hepsicii bilä, ama Büük Vasiliy hem Grigoriy Allahsözlü vardılar dostlar. Pek çok vakıt onnar biläydilär, sade biraz vakıt, açan artık Büük Vasiliy yalvarȇr kendi dostuna Grigoriy Allahsözlüyä, ani o olsun arhierey. Sade ozaman onnar nekadarsa vakıt ayırılyerlar, onun var kendi sürüsü, angısını o güder, übürünün da var kendi sürüsü, angısını o güder. Okadar onnar diilmişlär bilä.
Bizim Klise onnarı anȇr, biz diil çoktan, bir ay geeri, andık Büük Vasiliyi — onun vardı yortusu. Pazar günü bizdä vardı İoann Altınaazlının yortusu. Taa ileri da, cumaa günü, vardı Grigoriy Allahsözlünün yortusu.
Onnar hepsicii anılyerlar birär-birär, ayırı olarak.
Ama böönkü gündä onnar anılyerlar bilä, neçin?
Neçin deyni olyer ölä, ani onnarın varmış hepsinin kendi alayı (grupa): var nicä demää, grupa insanı, angısınnar taa zeedä sayarmışlar Büük Vasiliyi, varmış insannar, angısınnar taa zeedä şayarmışlar Grigoriy Allahsözlüyü, kimisi taa zeedä sayarmış İoann Altınaazlıyı. Ama olyer onnarın arasında kavga. Da Allaa arhireydän aşırı söleer, gösteryer, haberleer, ani onnar üçü da var “Benim önümdä birtürlü”. Yok onnarın arasında büük-küçük. Onnar hepsicii var izmetci Klisää, onun için onnarı üçünü da lääzım saymaa birtürlü, birtürlü onnarı anmaa.
Bizä deyni ne var örnek?
Örnek var herbir ayozdan. Geçsä da pek çok vakıt, binnärnän yıl geçsin, herkerä ayozlardan var ne almaa örnek. Bekim, onnar yaşardılar başka vakıtta, vardı başka onnarın adetleri, ama Klisenin adetleri onnar hep var birtürlü, onnarda bişey diişilmeer. İilik için izmet hep var birtürlü. Biz hepsimiz bilyeriz, ani iilik lääzım yapmaa. Biz hepsimiz bilyeriz, ani fenalık diil lääzım yapma. Onnar herkerä vardı. Onnara da Allah verdi bölä derin fikir, ani onnar izmetettilär bölä Klisää deyni. Biz ikär olmasak da okadar kayet dirin fikirli, bekim, Allahtan bizä verilmeer nesaydı, ani büük işlär yapmaa, ama nekadar Allahtan verilyer, onnan da var nicä hem lääzım izmetetmää Allaha. Açan Allah vermiş bana beceriyim te bu işi, bän onnan var nicä izmetedeyim hem Allaha, hem da insana. Var nicä yapeyım hem insana yardım, hem Allaha da nesaydı olsun izmet.
Şükür Allaha, ani vermemiş hepsimizä, ani becerelim hepsımız birtürlü işleri. Kimsaydı becerer ustalıı, öbürü beceryer imää yapmaa, übürü – ilaçlamaa. Hepsinin var kendi izmeti. Kimsa taa çok nedä sa beceryer. Da insan biri-birinnän var nicä taa zeedä buluşsun, karşı gelsin, nedä sa yapsın bir iilik. Bunnan kendimizdä terbi etmää sevgilii.
Herbir insana Allaa veryer baaşış. O baaşışlan herbiri izmeteder Allaha hem kazanyer kendinä kurtuluş. Amin.
Prot. Feodor Karakalçev