Bobanın, Oolun hem Ayoz Duhun adına.
Sevgili kardaşlar hem kızkardaşlar! Büünkü yortu bizi azırlêêr te o büük yortuya, angısına biz azır olêrız kırk günnük oruçlan. Büünkü yortudan, ani var Panaiyan yortusu, ötä dooru bizim klise ölä da çalêr: “Hristos duêr, metinnäyin! Hristos Göklerdän, karşlayın!”.
Panaiyanın girmesi kliseyä! Her getirdiynän aklımıza istoriyayı, ani Panaiya duudu boba-anadan, angıların olmaardı uşakları, duaylan, yalvarmaklan Allah verdi onnara bölä bir nışan, ani onnardan duacek uşak. Da onnanar adêêrlar, ani her bir olyarsaydı onnarın uşaa, vereceklär Onu izmet etsin Allaha. Bölä da olêr! Açan sıra geler da duêêr onnarın Kızçaazı, da iki yaşında olduynan, İoakim alatlêêr getirmää Onu kliseya, ama anası düşüner, ani taa erken da brakêrlar taa bir yıl dursun anasınnan-bobasınnan. Da açan Panaiya üç yaşında olêr, ana-bobasınnan hem başka kızçaazlarlan, yanarak mumlarlan gelerlär klisä, piner Kendisi basamakları hem karşlêêr Onu kendi arhierei. Panaiya açan geler — üç yaşında Kızçaaz — geler, arhierei çıkêr Onu karşlamaa. O olmêr bir bişeysiz, hepsicinä deyni var Allahtan izin, ani ölä lääzım olsun. Klisenin önündä varmış onbeş basamak, kendisi piner te o basamaklardan da, arhierei getirer Onu kliseyä. Diil sade kliseyä, ama getirer Onu altarä, ani kimsey yok nicä orayı girsin, diil karılardan kim sa, ama popazlardan da, arhierei da girärmiş sade yılda bir kerä En Ayoz Erä. Avşamliin biz burada işittik, Angellar açan gördülär Panaiyayı girärkanä En Ayoz Erä — altarä, onnar şaştılar. Angellerä da geldi şaşmak, ani nasıl bölä Kız girer En Ayoz Erä altarä.
Bileriz ani büünkü yortunun troparindä da (tropar o var kısa türkü, angısı bizä açıklêr o yortuyu, gösterer bizä ne var bu yortu) çalınêr — Panaiya açan girer kliseyä, haberler Hristozun duumasını, Hristozun gelmesini erä, Panaiyadan gireräk kliseyä. Onun için da biz işideriz avşamkı yortu duasında, Panaiya getiriler terbi etmää Allaha deyni.
En ilk Onun üürenmesi var te o, ani klise hazırlêêr Panaiyanın klisedä yaşamasını, klisedä dua etmesini her bir işi nekadar vakıt O bulundu klisedä, Onun vardı hazırlanması ani duudurmaa Hristozu, ani getirmää dünneya ii haberi, ani te Ondan duacek Hristos, Angısı kurtaracek bütün dünneyi günahtan. Da o uurda O haliz üürener Allaha.
Biz da baktıynan bu yortuya, baktıynan Panaiya bizä deyni var örnek nicä biz lääzım üüredelim kendi uşaklarımızı. Ölä olêr ani biz kendi uşaklarımızı üürederiz her bir işä deyni, ama sade diil Allaha deyni. Baktıynan Panaiya — üç yaşında Uşaa vererlär izmet etsin Allaha, ani O bulunsun da üürensin klisedä. Onnarın canı acımêêr, koorkmêrlar, ani bekim imeycek vakıdıncä, nesa yapamayacek, ya üşüycek. Bobasın-anasın onda kahırı yok, neçin deyni onnar bilerlär, ani Allah verdi onnara o Uşaa hem Allah taa zeedä düşüner her bir insan için hem onnarın uşaan için taa zeedä düşüner nekadar onnar kendileri düşüneceklär.
Biz büün onnara bakarak kendi uşaklarımıza savaşêrız her bir işi: terbi ederiz uşaklarımızı her bir işä deyni, kompüterlara deyni üürederiz, telefonnara deyni üürederiz, voleybola deyni üürederiz, futbola deyni üürederiz, ama sade diil ani Allaha. Kalan işlär her bir işä deyni üürederiz, ani isinnär vakıdınca, ani üşümesinnär, hepsinä onnara deyni üürederiz, sade ani üüretmeriz Allaha deyni. Kalannı biz hepsiciini yapêrız, nicä analar-bobalar çalışêrız, düşüneriz, kahırlanêrız kendi uşaklarımız için, ani onnarda olsun hepsici islä, üürensinnär da hepsini, ama onnarın arasında kalêr en büük terbietmäk — getirmää uşakları Allaha, terbi etmää uşaklarımızı Allaha deyni. O te bizdä ikär olêr, ani onda o kösteklener, onda o topallêr, neçin deyni biz ona deyni hepsicindän az düşüneriz. Onun için da olêr: uşaklarımız bizim tamannêrlar hepsini nerada ne var, her bir işä deyni, ama Allaha sıra gelmää deyni, bizim canımız pek acıyer, ani onnar doymayaceklar uyumaa, ani onnar imeyceklär ne isterlär nekadar isterlär, ani onnar lääzım oruç tutsunnar hem kalan işleri. Bunara deyni bizdä olêr pek büük kahır. Da bizä sıra geler zor çekmää, sıra geler toplamaa te o acı meyvaları, angısınnarı biz kendimiz da ekeriz. Neçin deyni büün, ani kahırlanalım, ani uşaklarımızın cannarı gidecek cendemä, biz bunnar için kahırlanmêrız. Açan Hristoz söleer fariseylerä: “Kahır sizä, betva sizä, ani siz dolaylêrsınız koca er, bütün dünneyi dolaylêrsınız, ani bir kişiyi getirmää deyni kliseyä, da sora onu yapêrsınız cendemin oolu”. Bizdä da ikär ölä olêr, ani kendi uşaklarımızda hepsi taman olsun, ani onnarın cannarı kayıba gider, biz onun için kaherlanmêrız. Pek canımız acıyer! Pek, ani istämeeriz, ani onnar nesa doyunmasın, aaç kalsınnar ya da üşüsünnär — bunnar için kahırlanêrız. Ani almêrlar komka, tutmêrlar oruç, bilmerlär dua etmää, bir da duaya üüretmeriz uşakları, neçin deyni kendimiz büün öläyiz, analar-bobalar kendimiz gelmeeriz kliseyä. Kendimiz büün istämeeriz oruç tutmaa, kendimiz büün istämeeriz dua etmää, üşeneriz evdä dua etmää. Neçin deyni kalktıylan sabaalen kaçınêrız tamannamaa işleri, her bir işi tamannêrız, ama sıra geldiynen klisä, ozaman ya etiştirämeriz, ya nesa çıkmış hemen, nesa taa başka — açan kendimiz bölä yaşêêrız diil hristiyanca, ölä da olêr uşaklarımız, da bölä üürenerlär.
Büün bizdä çok var nicä sölemää, ani bizim inanımız yavaş-yavaş basılêr, çiineneer, neçin deyni ne braktılar bizä bobalarımız-analarımız, biz te o yortuları da pek bakmêrız. Açan biz küçüktük hem yaşaardık sovet vakıdında, üüredärdilär bizi okullarda, ama biz bilärdik, ani Kolada, Eni yıl eskiyce, Paskellä mı — onnar bizä taa paalıydı o yortular. Büün bizä kalêr, ani çıkêr türlü-türlü mındar yortular: “sevgililär günü”, “hellouin”, islä, ani taa klise onnarı durgudêr, ani onnarı diil lääzım bakmaa. Neçin şeytanı çaarmaa? Şeytan ölä geler çaarmadaan da, biz onu çaarêrız taa hellouinnan kendimizä.
Biz lääzım ayıralım, neçin deyni apostol Pavel söleer: “Her bir duha inanmayin!”, ani biz lääzım olalım kuşku. Açan çekederız imää yapmaa, her bir işi orayı koymêrız o imeya, deyciz ki vasüleyi çekederiz pişirmää. Biz o vasüleyi en ilk ayıtlêêrız, ani bakêrız — bokluk var sa arasında da sıbıtmêrız pişirärkene vasülen içinä, ikêrız da hepsicini yapêrız. Burada sa olêr, ani her bir işi bakmêrız ani mındar mı, diil mi mındar, bizä sade olsun iip — içmää.
Büünkü gündä da, ani bizi bekleer önümüzdä yortu ani yeni yıl, biz ona deyni taa çok hazırlanêrız, çekederiz hazırlanmaa bir afta ileri, alêrız imeelik, içki, hepsici olsun, ani yeni yıl – büük bir yortu?! Da te ölä da biz göstereriz kendi uşaklarımaza nekadar ne lääzım olsun. Da terbietmäk uşakları baalı büüklerä, biz onu göstereriz kendi yaşamamıznan, ani nicä lääzım olsun. Her biz gösterärsak nicä diil lääzım, onnar ölä da yapaceklar, her gösterärsak nicä düşer, her bizim canımız acıyarsa uşakların cannarı için, ani nerayı düşecek onnarın cannarı – savaşacız üüretmää dooru.
Bu yortuyu da, angısını büün karşıladık gösterer bizä nicä lääzım kendimizi da götürelim, ani nicä lääzım olsun paalı her bir insana deyni klise. Panaiya orayı geler da oradan çıkmêr, bulunêr on dört yaşınadak te o klisedä. Bobası da, anası da Ona deyni da varmış paalı. Açan bizä paalı olacek, bizim uşaklarımıza da olacek paalı, açan sa bizä deyni diil paalı, uşaklarımız da onu bakmayaceklar. Neylän doyuraciz uşaklarımızı, ona görä da onnar olaceklar. Doyuracız compüterlan, futbolnan, voleybolnan yada başka işnen — onnarı da koyaceklar en ilk uura, kalanı sa olêr onnara deyni ötä beri, var sa, lääzım sa, bekim da ta nesa da olacek. Onuştan da İoakim hem Annanın teerbietmesi en büük, ani onnar getirerlär Panaiyayı kliseyä hem en paalı onnara deyni ani Panaiya olsun klisedä. Te ölä da hepsi insannara lääzım paalı olsun, ani bulunmaa büün klisedä neçin deyni klisedä var en paalı uurlar, ne lääzım bizim yaşamamizda. Onuştan Panaiya girärkana kliseyä, bunnan çekeder haber, ani Hristozun duumasına deyni. Biz da büün, açan geleriz kliseyä, kendi yaşamamızı ötä dooru düzeriz, ayırêrız te o yolu, angısını lääzım ayırsın her bir hristian, angısı adadı vartiz olyarkana klisedä. Allah versin bizä da, ani klisä olsun ölä paalı, nicä var Panaiya, nicä var dooru yaşayan insannara bizä da ölä paalı olsun. Uşaklarımızı da savaşalım dooru üüretmää, onnar da kabletsinnär en paalı işleri, ne lääzım bizä deyni erdä. Amin.
Protoierei Feodor Karakalçev