Hristos dirildi!
Bizim klisedä var ölä adet — bu pazar Ayoz klise aneer karıları, angısınnar bir korkusus gelyerlar Hristozun mezarına, tamannamaa adetleri. Geldiynän görerlar, ani mezar boş. Angel oturyer orada da söler: Yok O bırda! O dirildi! Bu ii aber, ani Hristos dirildi ölülerdän karılardan aşırı daalyeer bütün dünyaa. Allaa veerdi, onnar olsun ilk aberverici.
Bu aber daaldı bütün dünyaa. Geldi vakit da bu aber etişti bizim bobalarımıza hem analarımıza. Onnar getirdilär bu topraa bu dini, bu ayoz inanı, korudular onu. Biz bön aalaşyerız, ani zor yaşamaa, ama bizim bobalarımız hem analarımiz savaştılar bu dini korumaa. Biz bilyeriz, onnarın evleri diyl nicä bizim evlerimiz. Onnar yaşaardılar samannı suvalı evlerdä. Er bir suvacıkta, er bir samancikta, er bir kamuş yapıda, er bir taşta hem fidanda kapu önündä – bunnara hepsinä diktilär kendi dinini da korudular onu zorlarda da. Onnar duudurmadılar bir yada iki uşak, ama duuduryardılar 7-11 uşak. Onnarı nasaat edärdilär bu dooru inanda. Bizim bönkü konţerdın teması – «Baalantı dedelerin köklerinnän» («Связь поколений»). Bizim bobalarımiz korudular da kaybetmedilär bu inanı, getirdilär da verdilär onu bizä. Biz da lääzım koruyalım onu. Biz lääzım hepsini sevelim, hepsinnän dostluk edelim, ama diyl lääzım satalım kendi inanımızı para için, kazanmak için diiştirmää bizim adetlerimizi. Yok bişey, ani bizim dinimizdä yakışsın diiştirmää, deynä o var Allahın kurması. Allaa kurdu bu dini, da o yok nicä olsun başka türlü. O ekildiysaydi bizim üreklerimizdä da biz onu sataarseydık, olacek, ani biz sateeriz bobalarımızı, sateerız analarımızı. Bişey diyl lääzım kosteklesin, neylen sa bozalım dinimizi, bozalım adetlerimizi. Bu inanı getirdilär geçireräk ateştän da, sudan da, yaarlardan da, bayirlardan da – ikäär ölä da biz lääzım verelim kendi uşaklarımıza. Bizä sıra geldiynän ölüm da kabletmää, kaybetmeylim dinimizi.
Alla versin! Hristos dirildi!
Prot. Fiodor Karakaliçev