Bobanın, Oolun hem Ayoz Duhun adına!
Sevgili kardaşlar hem kızkardaşlar!
Böön karşı geler iki yortu. Biri, angısı bizi hazırlȇȇr Paskellä orucuna. O Evangelie, neredä sölener Allahın, Hristozun korkulu daavası için. İkinci dä bizdä böön yortu, angısına deniler Karşıgelmäk Allaanan. En ilk baktıynan böönkü Evangeliya, angısı söleer korkulu daava için, göreriz, ani Allaa hepsini insannarı, sıra gelecek, da ayıracek onnarı iki tarafa: birazını saa tarafına, birazını da sol tarafına. Nicä çoban ayırȇr kendi mallarını: koyunnarı saa tarafına, keçileri da sol tarafına. Bakȇȇrız, yok ölä nesaydı, ani Allaa ayırsın, deyeciz, ki zenginneri hem fukaaräleri, ayırsın saaları hem da astaları, gencleri hem ihtärları… Yok ölä ayırmak Allahta. Sade bir te o, neylän Allaa ayıracek hepsini insannarı: yaptın sän hayırlık osaydı yapmadın. Nicä Allaa söleer dä: “Olun hayırlı, nicä sizin Gökteki Bobanızda var hayırlı.” Sade Allaa onu bizdän isteer, ani hepsimiz lääzım olalim hayırlı yapmaa iilik deyni.
…Herkerä Allahı lääzım hayırlamaa, herkerä Allaanan var nicä karşı gelmää Komkada, herkerä Allahı var nicä karşılamaa, açan sän onu isteersin görmää, açan sän Onu aarȇȇsın. Böönkü bizim yortu üüreder bizi, sän yapaasaydın bir insana hayırlık, bakmasaydın, kim o, sän kabledersin Allahın azırlanmışını – Gökteki Padişahlıı, angısını Allaa azırladı dünnenin kurulmasından beeri. Vermesin Allaa, olmaa keçilerin sürüsündä. Keçi – o herkerä bizä deyni nicä siması var dikliin, yannışlıın. Döneräk böönkü günä, kim kimä izmeteder,ondan da kableder ödek. İzmeteder şeytana, ondan ödek dä kableder, keçilärlän bir sürüdä bulunȇrız. İzmetedärsäk Allaha, Allahtan da kablederiz ödek. Ozaman biz bulunȇrız te o sürüdä, angısı gideer Allahın saa tarafına. Amin.
Prot. Feodor Karakalçev
