Проповедь в день памяти Свт. Николая Чудотворца
Bobanın, Oolun hem Ayoz Duhun adına!
Herbir klisedä var, neredä anılȇr, sayılȇr Ayoz Nikul. İnsannarın arasında da, klisedä dä. Baktıynan, Allahın adına, Panayiyanın adına, onnardan sora var pek çok klise Ayoz Nikulun adına. İnsan onu anȇr. Ama diil sade anmak için. Ama lääzım savaşmaa benzemää ayozlara. Hepsi kendi ayozlarımıza lääzım savaşalım benzemää.
Adları da koyarkana uşaklara, onu da lääzım islää düşünelim. Verärkän uşaklara ad, vermemää te ölä ad, angısını hiç işitmemişik, hiç bilmeeriz, nesoy ad, kalendardä hiç yok ölä adlar. Bizim dikliimizä görä, yannışlııklımıza görä, alıp da uşaklarımıza vereriz ad, ani hiç yok. Lääzım bakmaa: kalendardä var te bu uşakların adı, onun var ayozu, onun var günü. Te o uşak vakıdınca lääzım okusun yaşamasını kendi ayozun. O uşak artık bilyer hem savaşȇr ona benzemää, kendi ayozuna. Açan sa vereriz adları, angısınnarı kendimiz dä bilmeeriz, nicä bir vakıt verärdilär sovetskiy soyuzda oktäbri revoluţiyasından soona – Oktabrina, te ölä ona görä adlar. Böön dä biz düşüneriz, te işittik Germaniyada te ölä ad varmış. Ama ne o adın maanası, bilmeeriz. Ne uşaan kabaatı, analar-bobalar, angısınnar vererlär ad uşaklara, da uşak kalȇr kendi gök koruyucularınsiz, kendi günü o uşaan yok.
Neçin? O uşak o adlan vartiz olmȇȇr, ama gözäl dursun. Neredä gözäl dursun, diil belli. Te onun için, bizim ayozlar verilmä bizä Allahtan, onnar var koruyucu, hem dä biz lääzım savaşalım onnara benzemää. Nicä böönkü gündä dä anılȇr Ayoz Nikul, sade savaşmaa olsun ölä canımız, olmaa acızgan, olsun sevda yakın insannara. Nicä Allaa söleer: “Sevmää yakındıkını!” Neçin deyni açan sendä yok acızgannık, sendä yok nicä olsun sevgilik dä. Te onun için, bizä veriler ayozlar, onnarı lääzım analım diil sade sofrada, ama lääzım onnarı anmaa yaşamamızlan, götüreräk kendi yaşamamızı te ölä, ani benzemää ayozlarımıza. Amin.
Prot. Feodor Karakalçev