Çıkarılyer Stavroz klisenin ortasına

Bobanın, Oolun hem Ayoz Duhun adına!

Sevgili kardaşlar hem kızkardaşlar, bizdä böön küçük yortu, küçük orucun çeketmesi. Küçük oruç çekedyer yortulardan hem nasaat etmelerdän, ölä örnektän, angısı bizä hepsimizä bu vakıtta pek faydalı: çıkarılyer Stavroz klisenin ortasına da biz hepsimiz ona baş iildyeriz.

Nedän kalyer bu?

Kalyer bir iştän, ani hererdä, açan olyer astalık, olyer karar, nicä biz böön deyeriz “epidemiya”: insannar astalıktan zor çekerlär da çıkaryerlar Stavrozu, çıkaryerlar ikonaları da gezerlär, duaederlar da astalık çıkınyer geeri. Bu bizä deyni böön var örnek, neçin deyni biz karşı geldik o uurlarlan, açan hepsimiz göryeriz astalıı, angısını yok nicä bişeylän durgutmaa. Böön bizä deyerlär, ani lääzım maskaları taşımaa, lääzım başka iş ne sa. Ama biz göryeriz, ani fayda onnardan yok hem yok nicä da olsun.

Her bir iştä lääzım görmää Allahın İşini, neçin deyni, açan biz böön tanımȇȇrız nedän hepsicii olyer, açan biz yaşȇȇrız günahta, açan yapȇrız günah, ondan aşırı gelyer astaliklar, gelyer kahırlar, gelyer onar, nelär dünyada olyer: er tepremesi, yanȇr daalar, sular çıkȇr kendi tıynaklarından, kendi denizlerindän, derelerindän, çok var erlär, ani buulyer, bozulyer evlär, yollar, bozulyer kırlar, nerada büyer terekä. Te onnar olyer bir iş için, neçin deyni insan yapȇr günah. Da Allah salveryer bizi fikirlemää deyni,  annayalım da getirelim Allahı aklımıza, getirelim aklımıza, ani günahlan yok nicä yaşamaa. Günahlan yaşaarkana bişey doorulmȇȇr, bişey islä olmȇr hem yok nicä da olsun.

Bakmarsak Ayoz Yazıya, bakmarsak Klisenin Ayozlarına, ozaman nedän biz örnek alyerız? Ozaman neya biz böön var nicä bakalım, nedän biz var nicä sayılalım hristian, açan biz saymayacız Klisenin  kanonnarını, bakmayacız Klisenin istoriyalarına, o Ayozlara, angısınnar geçirdi zorları hem zeetleri, kan döktülär, canını verdilär? Her biz onnara bakmarsak, neya biz böön bakacız? İmäklerä mi, ani sofralar kırılyer imäklerdän, onnara mı bakacız?

Bakacız salt, ani sade sayılacız dışandan hristian, ama bir işimizlän da yapmayacız bişey, ani alizdän taşıyalım dooru ad hristian.

Onnar hepsicii bizä deyni örnek hepsimizä. Örnek te ona, ani görelim Ayozları, görelim Klisenin dolumluunu, da savaşmaa tanımaa hem savaşmaa tamannamaa onnarı. Bizä deyni var böön örnek, ani biz kuvedimizä görä savaşalım geçirmää orucu, faydaylan olsun bizä te bu oruç, bakarak Ayozların yaşamasına, bakarak Ayozların izmetlerinä, Allaha, biz da savaşalım olmaa onnar gibi, baalem savaşalım benzemää o hristiannara. Amin.

Prot. Feodor Karakalçev